早睡早起身體好

由細到大都好鍾意訓覺。

近幾年成日都好疲累，更加連廳張梳化都唔放過，有時攰得濟，係廳都訓得著。

未返教會之前，放假日子我一定會訓到自然醒，試過訓到下晝4點先起身。

不過依家就唔可以訓得咁盡，試個一次起身已經下晝2點，第一個感覺係後悔，因為大好嘅一日比我浪費咗一半；醒咗之後，頭痛加上個腦實晒，仲衰過未訓之前。

雖然一個星期7日都要早起身，好似無得休息多D，不過我都好贊成『早起』，雖然有掙扎，但係時間好用好多，個人都精神D。

如果我可以做到『早睡』就更加好啦！

病重

出咗建道個camp之後，本想快D係呢度分享，點知好快就病咗。

雖然只係感冒，不過今次係好惡嘅感冒。

好耐無發燒嘅我燒到39度；
3日裡面睇咗兩次醫生；
平時火燭都唔醒，竟然一晚醒3次；
沉迷嘅FB遊戲病到幾乎戒咗(因為返到屋企已經無力再上網)

請為我祈禱，希望快D好返，因為下星期開始會好忙，而且都想快D分享係建道嘅得著。

Octave

『一期一會』之後，好想睇舞台劇，結果選擇『柯廸夫Octave』。

『原來....我已忘記了自己真正的聲音』
『柯廸夫 - Octave，音樂上的八度音階。就似人生，若你只敢將聲音游走於一個Octave，當然平穩過渡。你敢將你的音域擴闊到兩個，甚至三個Octave嗎？生活自此會如履薄冰，容易走音，但人生才會變得悅耳有意思。』

一班中學同學有一個共同夢想 –參加Drama比賽表演『柯廸夫』，10年後，大家都被身處嘅現實環境改變，失去童真、失去夢想、失去快樂、失去堅持、失去愛心、失去心裡面一D好重要嘅元素………生命變得沉重。

終於，一把心裡面嘅聲音 - 柯廸夫，重燃一團已經熄滅嘅火……叫佢哋再次搵返生命嘅動力。

我哋都曾經有一D想做嘅事、令自己向前嘅動力，或者叫做目標、夢想、一團火。

我覺得呢團火可以燒得最旺嘅時候，應該係青年時代，呢個階段開始有自己諗法，未有社會壓力、仲未開始現實生活嘅包袱，就好似劇裡面嘅主角。不過10年後，我哋又會發現自己不知不覺改變咗，尤其是最重要嘅心態。

成長只會令人失去？定係我哋無捉住、無堅持一D唔可以缺少嘅生命元素？

還年輕時，要尋找你嘅柯廸夫。
當心裡面嗰團火開始熄滅，要重尋你嘅柯廸夫。

一期一會

有個同事借咗『一期一會』嘅DVD比我，佢話好好睇。

『一期一會』 - 一生僅有一次的相會。

一個又一個關於失去嘅故事發生係一班臨近大學畢業嘅學生身上。

無帶任何期望睇呢套音樂舞台劇，結果係意想不到嘅感受。

無諗過係講呢一種愛情故事、無諗過朋友係可以咁、無諗過會越睇越投入、無諗過會令人喊………

真正嘅朋友 – 無論誤會對方，定係對方真係做錯，嬲完鬧完之後，都係最撐你嗰一位。

中間一幕：

當其中一個女主角不知不覺返去一個地方等佢已經分手嘅男朋友，明知唔會等到，佢仍然黎呢度。

『我都唔知自己黎呢度做咩？』
『你黎呢度等奇跡發生囉，就算奇跡真係唔出現，起碼可以令到自己死咗條心！』

就算係女強人，本身愛錢又現實，平時好理智果斷，但係愛情都會令佢好迷茫，無晒方向。

差唔多最後一幕：

主角唱『當我想起你』，另一個主角出黎同佢D好朋友逐個擁抱，亦係最令人心酸嘅場面。

最大感受係：

原來外表最樂觀開朗嘅人，背後可能有另一個故事，最終都會有一日捱唔住……

表面最開朗，由細到大都被教導唔可以喊，慣咗不停輸出正能量，結果………

一班情緒時起時落，間唔中流露負能量嘅人，唔掩飾、唔理人感受，想做就做，雖然會傷害人，不過幸福嘅係佢哋身邊有一班互撐到底嘅真朋友，所以咩都可以捱過去……

一班演出者都做得好好，尤其喜歡湯駿業嘅演出。

The Cock from Portugal

六姨同六姨丈去完葡萄牙，帶咗一隻會隨天氣而變色嘅公雞返黎。

天晴係藍色

呢兩日落雨，所以轉咗粉紅色
陰天嘅時候變過紫色呢!

望住呢隻會變色嘅公雞，都幾得意架!

原來公雞係葡萄牙嘅吉祥物，好多紀念品都用公雞設計，係最受歡迎嘅民俗藝術icon，甚至係葡萄牙非正式既國家象徵標誌。

睇電視

其實我都鐘意睇電視，可以一直睇落去唔停個種，不過唔會追劇集，所以只要唔開電視，就唔會有non-stop嘅情況出現。

今晚因為手頭上無咩嘢要趕住完成，可以小休一吓，所以做咗一件好奢侈既事，就係用咗2.5小時睇明珠930。

好多時明珠台會播一D我有興趣嘅電影，好想睇，不過一諗起要用2-3個鐘就放棄，情願錄低遲D有機會再睇，結果......只係儲起好多未睇嘅戲！

睇電視之後只會將時間表順延落去，繼續做埋其他事，結果犧牲咗訓覺時間，第二朝就慘啦，不在狀態咁面對一日嘅工作。

發夢

曾經試過發夢見到一D人一D事，醒咗之後，仍然覺得好真，過咗一排，都分唔清究竟係真事定發夢。

其實夢境都幾得意，天馬行空，咩都可以發生。

有時以為自己跌落山，真實情況係我差D跌落床，個一刻的確真實到不得了，好驚。

又試過夢中傷人，一邊比警察追，一邊逃走，好真嘅感覺，醒咗之後好安樂，因為知道脫險啦，只係發夢。

都試過發一D傷心嘅夢，醒咗仲有眼淚……

近排發現境夢原來可以將人嘅距離拉近。

上星期有位姊妹發夢見到我，由於夢中情節真嘅一樣，太真實……就係咁，令兩個忙碌嘅人又聯繫上，分享夢中嘅情節，真係好攪笑。

由東涌到大澳

復活節假期同幾位弟兄姊妹 + 舊同學一齊行山，由東涌行去大澳，2粒星既難度行4個鐘，不過對於我黎講係Double嘅難度，對腳痛咗幾日。

不過一齊行山，沿途有好風光(雖然我成日望住地下，怕踩錯腳跌倒)，加上天氣唔錯，總括都係一個有益身心嘅活動。

4個鐘嘅行程，測試到我身體真係麻麻地，行包尾，仲要氣喘喘，真係需要多D運動。

行咗一陣就望到機場景

D花瓣跌晒落水面，現場睇仲靚

沿途風景

終於到大澳啦!

好想入去水上屋參觀下

燒魷魚勁多人排隊，真係咁好味?不過佢剪魷魚時似表演多D，哈哈

另一條長龍.......係雞蛋仔，每次只係整一底，所以要等

限量版

同事係日本買咗綠茶布丁比我做手信，佢叫我試完話佢知好唔好味，原來呢個係櫻花限量版。

我問佢唔知好唔好食又買？佢話因為係限量版。

每次見到限量版時，總覺得好特別，而且之後就唔會再有，所以唔買就會走寶。

〝限量版〞 係一個Magic word，令人甘願大出血。

櫻花味有D似櫻桃味

珍惜......

今日有個同事唔舒服，去到醫院證實佢中風。

其實近呢年都有同事中風、血癌，不過今日嘅消息確實令我心情一沉，沉到依家都未平復。

同呢位同事唔熟，不過成日都見到，明明今朝佢仲幫佢老闆做緊嘢，突然就有呢個大改變，可能因為咁，我有D唔想接受。

返屋企途中，打比一段時間無搵嘅朋友，佢問我咩事，我話只係想知佢近況。

返到屋企，用比平時溫柔嘅語氣同媽咪講嘢，又同佢講我感受 (平時唔會做)。

今次事件又再提醒我去珍惜身邊人、珍惜健康、珍惜時間、珍惜生命、珍惜依家有嘅一切、珍惜神……

短程慈悲

『值得』裡面其中一段，成為我好好嘅提醒。

作者去探訪老撾山區貧民，雖然見到當地窮困情況很淒涼，不過佢唔想喊。

『山區的貧民並不需要額外的眼淚，他們真正需要的是幫助(支援)。哭的背後意義是憐憫；但假若憐憫盡頭並沒有產生肋人的動機，這種眼淚就成空殼。悲天憫人地流下熱淚，最終卻提供零幫助，往往是你我都會犯下的短程慈悲。』

原來我成日都只係帶住『短程慈悲』去憐憫身邊見到嘅人同事。

婆婆彎晒腰去執紙皮、老人家係烈日當空 / 寒風之下派傳單、伯伯追巴士追唔到……………

慣性地只係心裡面有D酸，但又無提供實質幫助......

唔好再單單停留係短程慈悲上面啦！

拆利是

過咗農曆年一段日子，終於拆利是啦！

近幾年逗利是嘅心態改變咗，人大咗都唔會好主動去逗利是，有時覺得D已婚朋友好慘，交稅之外，仲要係過年大出血，真係有D唔好意思。

係公司，見到D唔熟嘅同事都唔會主動講恭賀說話，免得以為要攞利是，最後只係點吓頭就算。

不過有D同事都好好，主動走黎派利是，有誠意又無咁混亂，令人無咁尷尬添。

記得以前有D人帶住個全盒，聯群結黨去祝賀已婚同事，感覺真係好似去打劫咁呀，剛剛出黎做嘢嗰時，我都好似做過新年劫匪，諗返都有D唔好意思。

至於Agent，有D未結婚都會派開工利是，有部份仲會比得特別大封，曾經試過拆利是嘅時候先發現，但係又唔知邊個比，個刻真係有D內疚，所以最好寫返個名。

有基督徒同事用印有經文嘅利是封，有D仲加福音單張，真係好！

數算呢份額外收入之餘，心裡面真的感恩神嘅供應，要將當納嘅獻返比神呢！

無得揀

當我哋講〝我都無得揀〞嘅時候，係咪真係無得揀呢？

最近終於睇咗〝穿Prada的惡魔〞。

女主角剛畢業就入咗時裝雜誌社，跟咗一個好出名嘅總編做助理。慢慢佢放低咗做記者嘅理想，跳入一個五光十色嘅圈子裡面，漸漸跟咗呢個主流去行。

每次男朋友投訴佢嘅改變，佢都回應：『因為我有呢個上司，所以我無得揀！』

最後男朋友話：『呢個上司係你自己揀嘅！』

最後女主角都揀返自己嘅理想，成為一個真正嘅記者。

有時〝我都無得揀〞好易成為一句直接由心發出嘅口頭蟬，多數都係經一D負能量爆出黎，希望得到人哋安慰。

〝無得揀〞係因為我哋已經〝揀〞咗一個取向 - 揀咗呢個環境、呢份工、呢個人、呢個………只係某程度之下，有D嘢無得揀。

似乎我哋要學習接受所〝揀〞，減少抱怨，否則就要諗吓係咪應該要再〝揀〞過？！

值得

收到兩份禮物 !!!!!!

睇咗開頭，心有點酸，每個人都有自己嘅擔子同壓力，禱告神，靠住神，唯有神係出路……

好想快D睇完本書！

影相

見到一對夫婦係度影相，老公幫太太影完之後有以下對話：

太太：『其實可以唔使影咁多景架！不過唔緊要啦！』(溫柔咁講)

老公只是『嗯嗯』

太太：『我頭先幫你影嗰張唔係咁架，個人影得大D架！』(仍然溫柔咁講)

老公繼續『嗯嗯』

太太：『不如你幫我再影啦，影大D個人喎！』(溫柔不變)

再影，之後睇返張相……無再講嘢啦……

呢種情景我都時有面對，都幾大壓力架，因為總係影唔到對方要求。

有時我會叫對方影咗我先，之後我再盡力跟佢個角度幫佢影，不過都係差D。

有時又會叫對方較好個位先叫我襟，好似穩陣D。

如果你叫我幫你影相，唔好有太大期望喎！

玻璃體混濁

等咗一個禮拜，終於睇咗眼科，醫生話我係飛蚊症，即係玻璃體混濁，不過好難斷尾。

好消息係眼底無事，唔需要有任何手術治療，正常應該會覺得開心，但係嗰一刻竟然有D失望。

因為我雙眼感覺到嘅唔舒服仍然係度，尤其是係公司更加對光線敏感，依家唔需要治療，即係無方法改善到呢個情況！?

無奈！

Resting @ Starbucks

今日出去尖東，去咗海傍Starbucks，好鐘意呢間，因為個環境好，靜靜地睇下書Hea吓實在係一大樂事。

坐係樓上，好靜好悠閒，望住個海，舒服到訓咗45分鐘……Zzzzzzz

專登帶本書出黎睇 ---- 〝心意更新〞，呢本書係好多年前團契要買，以前唔係好識欣賞，依家睇返就好鍾意，講得好中呢一刻嘅情況。

〝如何調整內心生活〞 --- 越面對生活上嘅大小事情，就越需要收拾一下內裡嘅世界。忽略內心需要，就唔可能承擔重大嘅事同壓力。

睇書其實唔係我強項，一本書可以睇好耐，好想快D完成呢本書，希望有所得著！

突破

做咗一件好事，突破咗心裡面掙扎，好開心呀！

今朝搭43X返教會，有個伯伯上車問車長

伯伯：『呢架車經唔經梨木樹呀？』

車長(諗咗一陣)：『經呀』

伯伯就坐咗係我對面。

我心諗，呢架車行三棟屋個邊，唔經梨木樹個喎！

不過當時架車好靜，我覺得唔係幾好意思同伯伯講，一係我轉車個陣叫埋佢落車囉！

點知伯伯突然走去樓上座。死啦！我未同佢講架，陣間佢去唔到目的地好慘喎！車長比人鬧又好慘喎！

心裡面有D後悔頭先點解唔講，不過算啦，都上咗去，無辦法啦！

但係心裡面好唔舒服，覺得應該要話佢知！不過走上去又好似好傻仔！好掙扎呀！

最後....都係決定上去，唔想又後悔多次。

真係好，一上去就見到佢，唔使行到去車尾！

做咗件好事，個心好安樂，不過最開心係衝破自己嘅限制呀！

P.S. 哎呀！原來我漏咗無話比車長知佢答錯咗呀！

怕羞草BB

有個同事送咗幾粒怕羞草種子比我，經過一個禮拜，怕羞BB出黎啦！

好似一條芽菜，心諗，個樣唔係好似怕羞草嘅，遲D係咪真係會變樣呢？

有一日放工，見到真係有怕羞草嘅DNA，一到夜晚就會縮埋啦！其實諗唔明，佢哋點去分朝早同夜晚呢？因為office由朝到晚都開燈，應該唔大分別架，WHY？

長者日

今朝約咗鄺伯伯飲茶，自從佢雙腳唔係太舒服之後，就轉咗去屋企附近嘅教會，好耐無見佢啦，見佢精神都唔錯，不過身體始終無以前咁好。有機會同佢太太傾計，知佢有時都跟鄺伯伯參加教會嘅戶外活動，實在感恩。

其實最近除咗媽咪之外，心裡面都湧現一D長者，好似鄺伯伯、一位舊同學媽咪、有心臟病嘅姑姐、有心臟病同糖尿病嘅姑丈.......

崇拜時候先知今日係〝長者日〞，今日講道提咗好多長者嘅信息，心裡面又諗起佢哋，覺得可以為佢哋做多D。

關心長者就好似同時間競賽，尤其是身體有病嘅，唔知佢邊日有精神傾計。雖然有時好忙，好疲累、又唔知同佢哋講咩好，不過見到佢哋因為得到關心而笑瞇瞇，就知道應該要做，亦都值得去做。

總覺得依家嘅人，對長者嫌棄多於欣賞，希望我都可以調較一個正確方向，欣賞長者曾為家庭為社會付出，對佢哋多D關心多D體諒。

其實幾十年後，我哋都係長者……唔知後生一輩又會點對我哋呢？