Jodie的禱告

最近公司雖然超級忙碌，不過都搵咗一日上表妹屋企食飯。

最開心就係可以見到Jodie呢位可愛嘅小天使。

今次又可以講bible story，講故事好似進步咗D，感恩呀！

上次想同佢一齊祈禱，不過無把握機會佢已經瞓咗，今次終於無錯過啦！

本以為我開聲祈禱，點知一合上眼，Jodie就開始多謝天父：

『多謝天父比我食晒一碗飯，多謝天父…………』

小孩子嘅心真係簡單又純潔，唔怪得耶穌咁愛小孩子啦！

因為呢一晚咁好嘅經歷，令我係第二日忙碌工作中都有力量呢！感謝神！

父親節

今日係父親節，去咗圓玄學院，幫Daddy清潔下張相，放好支太陽菊。

望住張相，諗下以前嘅父親節係點慶祝呢？印象好模糊，好多年啦，真係無具體記憶……

有位嬸嬸問我要唔要裝香，我話唔使，望住Daddy，我係度諗，究竟將來我哋可唔可以係天堂見返呢？以前有無人向佢傳過福音？有無接受過耶穌嘅救恩呢？其實我知唔會有答案，真係要將來返天家先知。

媽咪成日都講：『父母健康時唔好好孝順，等人老咗咩都食唔到行唔到就無意思，生前請佢飲茶好過死後比隻雞佢。』

呢一刻，我望住張相，可以做嘅只係抹吓個碑，跟住就無其他野可以做。

心裡面有種諗法 – 珍惜身邊人、把握機會傳福音。身邊仲有好多親人，仲係現在式，仲可以關心佢哋，仲可以介紹耶穌比佢哋認識。

To be number 1

身邊好多做父母嘅朋友，大多數都好緊張自己係仔女心目中嘅排位。有時見佢哋攀升到第一位個種雀躍心情，都為佢哋開心。

始終係人哋心裡面佔一席位係有代表性，尤其是自己仔女，都可以想像到呢個第一位真係好緊要。

當自己越來越大個，身處嘅世界都變得闊咗，唔同階段，媽咪係心裡面嘅位置都有上有路，有時仲跌過底線。
如果媽咪一直都有將排位嘅事放係心，可能我都曾經令佢失望。

當我見到朋友對仔女嘅重視，當排位跌咗之後個種失落，似乎提醒我都要做好D仔女嘅本份。

試過媽咪唔記得為我預備早餐，佢好唔安樂，第二朝一早起身幫我整；佢知我好懶切生果，所以幾乎每晚都整定D生果比我；好想我有住家飯食，就算已經10點，有時都等我放工一齊食；知我工作咗一日，就算我同佢爭洗碗，有時佢都堅持夜麻麻幫我洗；雖然佢唔識安慰我，但都好努力去講一D支持嘅說話(雖然有時令我更激氣，但也是一種關心呢。哈哈！)

忙–好似係一個理所當然嘅藉口叫人少咗關心父母，不過佢哋當年為我哋所付出嘅時間，正正係人生最忙最精彩嘅階段，而且父母辛苦咗咁多年，享兒女福係應該。希望父母都可以得到我哋心裡面一個應有嘅位置。

上次陸牧師講道提過當父母年紀大又多病嘅時候，因為身體限制，我哋想再得到父母以前個種關心都唔容易，個一刻我個心都有D酸。

『要孝敬父母，使你得福，在世長壽。這是第一條帶應許的誡命。』弗六2-3

至於天父，佢對我哋嘅愛更大更深，理應排第一位應該係佢，究竟係我哋心裡面，天父實際排第幾呢？

意外

上星期五lunch時收到家姐電話，佢話係樓梯跌親，個頭流緊血。

我係附近，可以即刻去搵佢，一邊行，心裡叫自己冷靜D，行到一半先發現自己行錯路。

當我越接近事發地點，腳步越急，個心開始緊張，唔知會見到一個點樣嘅情境，真係無事？

見到家姐坐係地下，個頭仲有D流血，不過已經控制到，無頭暈，無作嘔，清醒，咁都無咁驚。

第一次坐救傷車-去律敦治，第一次去急症室 - 等好耐。

家姐情況屬於半緊急，張紙話輪候時間大概90分鐘，最後照埋X-ray攞埋藥要4個鐘。

輪候期間打比哥哥，無打比媽咪，唔想嚇親佢。
輪候期間同隔離嘅婆婆、推家姐照X-ray嘅嬸嬸傾計，呢個地方好需要福音，係一個去關心人嘅地方。
輪候期間發覺可以有能力返工、可以周圍去、可以有健康身體真係一份要珍惜嘅恩典。

如果將來要去急症室，一定要帶定本書去睇，等嘅時間真係太長啦！

我哋比媽咪更早返到屋企，當媽咪知道家姐受傷，第一個反應係好緊張話：『唔係呀麻！』其實之前無打比佢係一個明智決定。

成晚媽咪都話：『早知你帶飯就唔使出去，咁就無事啦！ 一定係唔夠訓先會比人撞！ 下次要小心D啦！……』就係大家都聽到好無奈之下，媽咪終於舒緩到情緒，開始講返一D令人得安慰嘅說話：『我聽日唔去街啦！煲返D湯比家姐補血。』

不過最安慰係佢講：『真係要感恩！』感謝神叫媽咪諗起天父有保守。

突然發現，我哋屋企嘅女人都幾堅強，而且都唔鍾意係人面前留眼淚。

P.S. 見到電視講緊仔女送禮物比媽咪慶祝母親節，媽咪講咗句：『呢份就係今年比我嘅母親節禮物囉！』

三滿月

今晚Jodie嘅妹妹Janice〝三滿月〞，仲可以同佢媽咪一齊慶祝生日。

表妹安排我座係Jodie身邊，幫手照顧佢，可以同佢成晚係一齊，真係好啦！

Jodie仲同我講：『Bonnie EE呀, 你係個嘅Favorite Auntie呀！』我真係勁開心！

其實Jodie有好多聖經問題，有次我去佢屋企，佢食緊飯，第一句就問我：『天父使唔使食嘢架？』

臨瞓前同佢講Bedtime Story (講聖經故事)，佢問：『天父會點樣保護我架？』

對我嚟講都有D挑戰，點樣解釋先可以簡單又容易令佢明白呢？真係要常作準備呀！

Janice & Mommy嘅生日蛋糕
妹妹好多頭髮呀!
家姐抱住妹妹
自己擺定Post比你影
問緊有關耶穌嘅問題好留心聽

虎年快樂！

虎年快樂！


經過初一初二嘅拜年活動，最開心就係可以見到JODIE，阿嫂扭咗D汽球公仔比在場嘅小朋友，佢哋都好開心。

今日可以留係屋企，仲做咗D家務同清咗D錄起好耐又未睇嘅劇集，有D成功感。


依家嘅假期已經唔可以好似以前咁玩到最盡個日，要留返一日休息吓先得。

Mini Jodie

妹妹係1月19號出咗世啦，希望Jodie適應做家姐嘅生活啦 ！

佢哋好可愛呀 ！

聖誕老人

姨媽同姨丈前兩日返咗香港，例必帶好多禮物比我哋所有人，而且又臨近聖誕，令大家好開心。

係我心目中，家族入面有兩個聖誕老人，一個係爺爺，另一個係姨媽。

細細個嘅時候，每年聖誕節，爺爺會趁我訓覺之後，靜靜雞放對聖誕襪去我間房，第二朝起身，我就會為到成袋食物而超級興奮。每次問大家，都話係聖誕老人送比我。

有一年，我企圖唔訓覺，要等聖誕老人出現，睇吓佢係咩野樣。當然故事發展落去，呢位小朋友好快就訓到成隻豬咁，比人抬走都知，仲點會等到聖誕老人呢！大個D先知呢個老人就係最錫我嘅爺爺。

另外，一到聖誕節，我哋都會聚係姨媽屋企攪大食會，有火雞、海鮮沙律、好多食物飲品放到滿檯都係，每個小朋友都有禮物，好開心好有節日氣氛。

能夠將歡樂嘅回憶帶比人真係好，多謝兩位聖誕老人。

恭喜!!

最近表妹公佈有咗第二個BB嘅消息，真係戥佢好開心，Jodie好快做家姐啦！

其實係表妹未講之前，已經有人話咗比我知……

8月中放假探佢哋，同Jodie係屋企畫畫，之後一齊去行公司，去到馬莎，Jodie忽然同我講：

『Bonnie EE，媽咪肚裡面有Baby呀！』

個一刻雖然好想話比表妹知我都好開心，不過見佢成日都無提，唯有扮唔知！

依家終於可以正式恭喜佢，仲可以將呢個好消息同媽咪分享。

不過呢件事話比我知，有秘密千祈唔好同小朋友講，因為佢會呢度講呢度散架！

預備好啦!

開始畫啦!

完成啦! 係孔雀呀!

飲返支益力多先，Jodie:『Bonnie EE，同你鬥快丫!』

專心睇人溜冰

媽媽的新電話

媽咪一直都有意無意話個手提電話唔掂，款唔好、顏色唔好、聲又細、重、D製又唔好襟………

話買個新嘅比佢又唔好，佢話自己唔係成日用、無咩必要、舊都用得架………

結果今日終於買咗個新電話啦，肯比我買因為夠『平』，只係$390。

由於佢唔要任何功能，呢部電話最適合佢，而且摺埋部機就可以收線，下次一定唔會係不知情下打電話出街啦！(因為佢唔識lock機)

買嘢真係會令心情好好架，我哋返到屋企之後，望住部新電話，嗰份新鮮感，令大家都好興奮。

見吓自己人

終於清晒上年必定要放嘅假期，三日眨吓眼又過去啦！

原來放星期三至五嘅感覺都唔錯，因為每次係最後一日假期必定有D失落感，今次因為有星期六日嘅恆常假期墊住，心情都還好。

有兩日去咗探親戚，見吓姨媽同Jodie，表妹問我怕唔怕浪費咗個假期！？

其實放假真係好多嘢想做，睇返之前錄嘅節目、擺咗好耐嘅VCD、好多未睇嘅書、做運動、執房、訓晏覺……

當我決定陪姨媽姨丈食飯、接Jodie放學睇佢游水嘅時候，真係有少少掙扎，不過又好似好耐無見，結果都選擇去。

姨媽姨丈年紀唔細，身體又唔係太好，平時見面唔多，但係好鍾意同佢哋一齊嘅時間，佢哋個種相處幾十年嘅默契，姨媽係老伴面前可愛嘅權威、姨丈笑笑口照單全收，總會令我會心微笑。佢哋之間唔係黐到實一實嘅恩愛，但從心底對老伴嘅緊張，令人有種好珍惜嘅感覺。

Jodie -- 每次見到佢都好開心，依家同人講嘢會哄到好埋，因為想你專心聽佢講，近距離接觸係同小朋友建立關係嘅一大步！

我問佢：『陣間係唔係去游水呀？』

Jodie：『係去浮水呀！』

佢依家識得浮水、『未』水、跳水、仲游到兩步啦！

雖然呢個假期少咗時間做自己嘢，不過見吓自己人都係值得！

Lovely Jodie

小朋友總係可愛，尤其是同你有親戚關係，只要佢聽話、有禮貌、活潑又願意同你玩，就會更加鍾意佢。

成日都會留意表妹個facebook，因為想update住Jodie嘅新相。

依家已經3歲啦！

今個新年係舅父屋企，Jodie令到大家都好開心，最開心嘅係媽咪，每次提起佢都會笑咪咪。

Jodie為大家唱〝星期歌〞

唔認老都唔得

今日去姑姐屋企拜年，表哥個女都有嚟，上次同佢傾計已經係幾年前，今日問佢幾時畢業，佢話兩年前已經出嚟做嘢啦。

吓！原來已經廿幾歲啦！係我心目中，佢仲係好細個，時間真係眨下眼就過去。

跟住見到另外一個表哥個女張相，嘩！變咗咁大個嘅！00年同媽咪去加拿大探佢哋時，佢只得5歲左右，好可愛嘅小朋友，依家真係好難接受佢已經變成一個少女！

今日睇住身邊朋友嘅BB仲好細個，其實好快佢哋就會長大成人，呢種過程有D恐怖不過又好奇妙！哈哈！

以前聽人講〝唔認老都唔得〞，依家真係感同身受。

媽媽一起禱告

媽咪下星期一同舅父阿姨去泰國，今次我請唔到假，令到媽咪好憂慮，因為之前去旅行我都會照顧佢，所以佢怕到時好唔慣，又怕係外地無安全感。

本來去旅行係一件樂事，但對媽咪嚟講就係苦事。因為呢次旅行，佢依經緊張左兩個月，安慰說話講完又講，情況一樣，我都唔知可以點。

一日同姊妹講開，佢提議我同媽咪一齊祈禱！

自從幾年前媽咪心情回復正常之後，我真係好耐無同佢祈禱啦，於是再一次鼓起勇氣問佢，哈哈！佢即刻將雙手合上等我禱告。

希望再一次令媽咪諗起要倚靠神，感受到平安同喜樂！

秘密高高掛

當我讀小學1年級嘅時候，已經開始有秘密。

以前屋企會將D大相掛係牆上面，我將D秘密寫低之後，就會收埋係相架後面 (以前嘅相架有條魚絲吊住後面，個架向前傾，唔會完全貼住牆，所以有空間比我擺野)

因為個相架掛得好高，所以我相信無人會發現我嘅秘密，哈哈！

至於我，又點樣將D紙仔擺上去呢？由於相架好近房門，所以我利用個門框，用壁虎功撐上去，再放D紙仔放入去。

過左一段日子，裡面已經儲左唔少秘密。

有一日，哥哥話已經知道晒，喺我質問之下，原來佢一早已經留意到呢個秘密地方，仲即時重組犯案經過：佢先跳起拍個相架，D紙仔就全部跌落地下，之後再用壁虎功放返D紙上去。

激死我啦！唔係話『最危險嘅地方就係最安全』咩？

不過都唔明，既然係秘密，點解我仲要寫出嚟咁危險呢？

再有微波爐的日子

自從兩年半前買左一個高D既雪櫃，就唔能夠容納擺係上面既微波爐。

無微波爐既日子，真係有D唔方便，不過最唔慣既都係媽咪。雖然佢好滿意個雪櫃，但係每次煮飯之後，D餸凍左又唔可以用最方便既方法整熱，佢就好懷念有微波爐既日子，近年不斷提出要買番一個。

奈何雪櫃同廚櫃之間只有10吋，咁細既空間好難搵到適合既爐，每次行街佢都會去電器店望一望，可惜都係空手而回。

終於阿哥立左大功，搵到一部好FIT既微波爐，從此媽咪就唔使再囉囉攣啦！

p.s. 雖知微波爐食物對身體無益，不過無事既時候，大家都係重視方便多過健康。

族譜

今日放假，同媽咪去大埔請姑姐姑丈飲茶。

其實除左拜年，平時真係少機會見，每次我都話得閒搵佢地，結果令自己都有D內疚，所以一定要有所行動。

除左問候同講近況之外，今日仲得知我地陳家既族譜添。

其實呢個話題得意之外仲好有價值，有時我地都唔知太公之後有D咩野人，通常紅白二事先會見到一大班唔係好熟，不過又同自己好有關係既親戚。

- 有D人同自己幾似樣，不過真係好少見，問多句先知原來係堂兄妹
- 有D人已經唔同晒樣，已經唔係我以前認識個位
- 有D長輩會望住我，不過叫左我家姐個名
- 有D長輩會講返我細細個既往事，有時真係無咩印象
- 有人會問你做邊行？結婚未？其實佢一早係其他親戚口中已經知道
- 想當年既故事會係開始一直講到聚會結束，都幾有興趣聽，同自己有關既歷史喎
- 返到屋企會再問媽咪，頭先坐埋一齊既親戚究竟係邊位長輩，又或者係邊位既仔女
- 好有興趣搵返細個D相，對照下大家變左幾多

呢種關係真係好特別，雖然大家各自有唔同既生活，但係又有息息相關既血緣關係。

有時我會諗，太公既子孫都唔少，會唔會身邊一D朋友同事，原來係自己親戚呢？世界有時都可以好細架！

內疚

一向都唔係細心既我，對人地既需要總係唔敏感，對屋企人更加大意。

今晚見到媽咪換左D床單出黎，知道佢想我幫手換D乾淨既上去，OK無問題，不過做埋其他野，遲多一陣先換啦……

哦！媽咪訓左囉！咦！我未攞床單喎！唯有靜靜入佢房(床單係裡面)。

原來佢已經預備左我個張係出面，不過自己就訓係未有床單既床上面。

一切都預備好，我就小小野都做唔到……

最大既懲罰-----內疚！

Happy Birthday to Mommy

今日係媽咪生日(舊曆)，夜晚一家5口(家姐+哥哥+阿嫂)去左又一城〝板前〞慶祝，大家都食到好飽！


我地最愛既珍寶帶子壽司！好肥美呀！


多謝林姑娘既生日咭呢！

對媽媽好一點

有一日，睇完下面既文章之後，即刻打比媽咪，因為好想聽下佢把聲，又想佢知我個刻想起佢.........

小明家是經營餐廳生意，有時放學後他會到餐廳幫忙，招呼客人入座點菜收拾碗筷、算帳結帳。他漸漸覺得自己似乎也成了一位生意人。

有一次，他忽然突發奇想，也開了一張帳單寄給媽媽，索取他在餐廳幫忙作事的酬勞。

幾天後，媽媽收到這份帳單，上面寫著：
１．洗碗盤費500元
２．掃地拖地費200元
３．送外食到顧客家300元
４．至郵局寄發信件帳單100元
５．小明一直是勤奮聽話的，值100元

共計1,200元

小明的媽仔細看過這份帳單後，什麼話也沒有說。

晚上小明在他的枕頭旁看到了他所索取的1,200元報酬。

正當他得意如願以償，要把1200元收到自己的口袋時，突然發現枕頭旁邊還放著一份給他的帳單。

小明欠他母親如下款項：
１．在母親家裡過十年平安無憂的生活費用0元
２．十年中，食、衣、住、行的費用0元
３．上學的學費、書籍費0元
４．生病時的醫藥、照顧費0元
５．有一個慈愛的母親0元

小明讀著讀著，感到羞愧萬分！過了一會兒，他懷著一顆忐忑不安的心;躡手躡腳地走近母親，臉藏進母親的懷中，小心翼翼地把那1,200元塞進了她的圍裙口袋裡。

看完後要對媽媽好一點，珍惜愛妳的人，當妳來到這個世界，她以手臂輕抱妳．妳則以哭個像妖怪的聲音來謝謝她

當妳一歲時，她餵妳也替妳洗澡，妳則以長夜大哭來謝謝她
當妳三歲時，她滿懷愛心的做飯給妳吃，妳則以滿地食物來謝謝她
當妳六歲時，她帶妳去學校，妳則以尖叫"我不去"來謝謝她
當妳九歲時，她讓妳學鋼琴，妳則以不曾練習來謝謝她
當妳十一歲時，她帶妳和妳的朋友去看電影時，妳則以要求她坐在不同排來謝謝她
當妳十三歲時，她建議妳要去剪個頭髮時，妳則以告訴她她一點品味都沒有，來謝謝她
當妳十五歲時，她工作回來並期待一個擁抱，妳則以房門深鎖來謝謝她
當妳已十九歲，她讓妳去念個大學，載妳去學校，帶著妳的袋子，妳則以在宿舍門外，怕她會讓妳在妳朋友面前蒙羞，就趕緊說再見的方式來答謝她
當妳已二十歲，她問妳是否有約會，妳則以"那不關妳的事"來答謝她
當妳二十一歲，她建議妳讓為妳的未來找個好工作時，妳則以"我才不想像妳一樣"的口氣來答謝她
當妳二十二歲，她在妳的畢業典禮緊緊的擁抱妳，妳則問她是否要付錢讓妳去歐洲遊學來謝謝她
當妳二十五歲，她資助妳的婚禮及高興的哭著對妳說，她有多愛妳，妳則以搬離半個國家的距離隔絕她的方式來謝謝她
當妳已三十歲，她跟妳說她想要有個孫子可以抱，妳則是非常謝謝她的跟她說，"時代不同，世事皆非了"
當妳已四十歲，她提醒妳要記得一個親人的生日，妳則是謝謝她的告訴妳，妳"現在真的真的很忙"
當妳五十歲了，她身體不適而且需要妳多多關心她，妳則是以自己已是深責大任的父母來回謝她

然而，有一天她死了，妳則發現妳未替她做到任何事，讓我們花些時間為我們所稱呼的"媽"，關 心，付出，有些人可能無法對他們的母親說出他們的愛．但她是無法取代的，因為它是獨一無二的感情。也許，她不是妳最好的朋友，也許有些想法真的與妳不同，但她仍然是妳的母親！

她總是在這裡聽妳訴說妳的喜怒哀樂，但問問妳自己吧！妳可有花足夠時間陪陪她？聽她說看看她在廚房的困擾及疲勞？以貼心，愛心，尊重的心來對待她時，妳會發現妳會看到不同的觀點．

一旦錯失了，將只有美好回憶陪伴著妳，請一輩子緊緊守住她，假若沒有她，生命將頓時失去意義。