Pearl Drama

明珠台有幾套劇集都好吸引。

House 醫神

House係一個好叻嘅醫生，不過性格都幾討厭，但又反映佢可憐嘅一面。

每次接到一D奇難雜症，最鍾意睇佢哋嘅分析過程同研究醫療方法，發覺要搵一個真係叻嘅醫生，真係唔容易。人體構造真係好奇妙，就算醫生有幾叻，都要面對現實，接受生老病死，呢D心理關口都唔易面對。

可能同工作有D關係，所以特別有興趣去睇。

Bones 欲骨查

一班法醫人類學家、泥蟲專家........各有不同專長，憑死者嘅骨頭逐步推斷出死因，藉住好少線索，以邏輯將成個畫面重組出黎，破咗唔少罪案，好犀利。

Monk 神探阿蒙
阿蒙係一個有超強記憶力，成日破奇案嘅私家偵探，不過性格古怪，一定要所有野都井井有條，稍為歪咗都令佢好不安。

除咗鍾意每次故事出人意表嘅佈局之外，實際上好欣賞男主角，佢將角色個種好堅持，唔可以容忍任何混亂嘅心情演繹得好好。

以上嘅主角都好叻，大家有唔同嘅強項，而且知識同分析力都好犀利，不過大家都背住唔少心理包袱。叻嘅人就唔可以係一個快樂人? 定係劇集嘅主角先要咁戲劇化? 唔知我哋身邊有無呢D朋友呢?

雖然只係虛構嘅故事，不過一班編劇搜集咗好多資料，加上創意做咗呢D精彩故事，都幾吸引架！

三好

〝宮心計〞裡面嘅主角三好有句格言：『做好事、說好話、存好心』

故事發生係皇宮，大家為左生存，又要上位，係一個無信任，你猜我度嘅環境，變得越來越保護自己、人性最差嘅一面都出晒黎。不過三好堅持用呢種態度去生活。

呢種性格會唔會只係做戲先有？！其實我都想有呢份信念同堅持。

『做好事、說好話、存好心』令我諗起聖經嘅說話(新譯本)：

凡是你手可作的，都當盡力去作。傳道書9:10

如果你的手有行善的力量，就不可推辭，要向那些需要幫助的人行善。箴言3:27

一句壞話也不可出口，卻要適當地說造就人的好話，使聽見的人得益處。以弗所書4:29

你要謹守你的心，勝過謹守一切，因為生命的泉源由此而出。箴言4:23

現實裡面，我哋身處嘅環境唔完美，一樣有好多陰暗面，人越大，學得越精、就越容易諗歪。

要做三好唔容易，不過都要盡力去做，我哋有神係背後支持呢！

我靠著那加給我能力的，凡事都能作。腓立比書4:13

廣告 - 想講.....??

最近萬寧有一個廣告，睇咗好多次我都唔知佢想講咩！(不過有D人一睇就明，咁即係我領悟力低？！)

最後先知係講個媽咪一開始就好細心為小朋友整〝魚丸〞，連最後一條魚骨都揀埋出嚟！帶出萬寧嘅信心檢定。

有時睇廣告都幾得意，有D好清楚話晒比你知佢想講咩 (我鍾意呢種，唔會miss咗佢意思呀)，有D就唔容易去明，要慢慢意會，不過呢種又會令我留下多D印象喎！

香港寬頻 - 中西區篇

有人話睇到呢個廣告就諗起我上次放工發生嘅事!
Oh....

明爭暗鬥

最近TVB夜晚重播〝刑事情報科〞，之前合家歡時間無睇過，反而依家吸引我每晚都錄嚟睇。

兩個女主角係公司為咗保住地位，引發起辦公室政治，鬥得誇張，亦耍好多手段。為咗保住自己權力，深謀遠慮、好多計算，少不免要利用人，傷害身邊嘅人。

其實好多電視劇都用呢類醜陋嘅人性做題材，不過一邊睇，真係覺得好心寒，真係要做人做到咁？

我相信現實世界一定有呢D情況，不過心理上又唔想接受殘酷嘅一面。朋友話如果我係呢種地方，會抵受唔住離開，我都相信係。

感恩依家身處嘅環境都仲有人情味……大家少D敏感，多D信任應該會更加好。

人嘅死穴離唔開權力、利益同感情，有D人好大方承認自己取向，有D人唔肯認，有D人唔知自己係，有D人慢慢被呢三樣野吸引……

可以理智嘅時候，大家都要KEEP住清醒嘅頭腦同良心，唔好將條底線越SET越低。

衝上雲霄

最近無線重播〝衝上雲霄〞，我好鍾意呢套電視劇，因為鍾意機場同飛機，而且呢套劇既人同景都ok，所以之前每集都有錄！

係HK機場出發既時候，一定最開心。

好鍾意係機場聽到拖住行李喼發出既聲音，因為呢個係去旅行既Signal，好有渡假feel。

我有個習慣，就係去旅行唔會帶電話，免得玩既時候唔見左或者比人偷，有時同行者就會埋怨，因為怕集合既時候聯絡唔到。

有個朋友經常最後關頭先check in，因為佢唔想咁早到，而且試過因為full左，upgrade佢去business class。但係我一定唔得，因為我會好緊張，好無安全感架。

上到飛機，我就會好忙，因為好鍾意用佢地既設施，有次長途機，本應要休息多D以免有時差問題，最後因為要睇戲、睇雜誌、聽歌、睇行程、結果都係無咩點訓。

試過遇到氣流，心情有D複雜，一方面好刺激，又上又落，仲有人嗌，但一諗起呢架唔係過山車，有機會出事就有D怯，感恩每次都無事。

最唔開心緊係離開當地機場啦，因為假期結束囉！

機場每一日都上演唔同既故事，悲歡離合樣樣齊，曾經諗過搵日放假去機場行下，唔知會唔會睇到特別既故事呢？

現代塵世美

『尋找塵世間尚未被污染既樂土，
近距離感受大自然力量，
用不同角度欣賞造物者心思，
重申快樂定義。』

一個由Eason介紹澳洲塔斯曼尼亞(Tasmania)既節目，開場白加上好靚既畫面，好吸引。

睇節目時，真係有種〝腳步放慢一D，目光放遠一D〞既感覺。

大自然既景色真係無敵，造物主既智慧好犀利，我地成日忙東忙西，有時都唔發覺原來大家失落左一D最寶貴，最可以洗滌心靈既事物。


一連五集，每個星期五晚7點，TVB。

追風箏的孩子 The Kite Runner

一位好友睇完本書之後極力推薦，當時無特別上心。直至一日見到有呢部電影上畫，決定一齊去睇。

真係無介紹錯，好鍾意呢個故事，睇完部戲之後，主角既心路歷程，有D似曾相識，令我好多思想，個心有D實實地，係一部令人有反省，勇敢接納自己既故事。

故事發生係阿富汗，12歲既阿米爾同年紀相若既僕人哈山感情好好，經常一齊放風箏同分享有趣既故事。一次阿米爾知道哈山比人性侵犯都無出手相救，呢件事之後，佢面對唔到自己，竟然想令哈山消失去逃避呢件事。後來因為逃亡，阿米爾同爸爸去左美國，不過20幾年後，佢仍然被呢件童年往事纏繞住。最後，為左勇敢面對自己對好朋友既內疚同贖罪，佢冒生命危險為哈山盡最後一點心力。

阿米爾提醒我，每個人都有唔少既陰暗面，基於唔同性格，我地未必處理得好，有時認為已經解決左既問題，原來一直無離開過，只係收埋係心裡面，到某一日可能會再出現。我地經常都選擇逃避問題，不過勇敢面對先係最終既解決方法。

好欣賞哈山，佢係阿米爾面前好似無左自己咁，不過唔係佢懦弱，只係佢好清楚自己僕人既身份，佢可以為主人變得好勇敢，好堅持。雖然知道阿米爾放棄佢，但仍然對佢好好，甚至犧牲自己。

故事既最後，阿米爾終於為哈山做返一D野，我知道佢已經補償左心裡面其中一個遺憾，能夠重新面對自己。

每個人都總有陰暗面，雖然唔會全部浮現出黎，但願我地都有勇氣去面對同處理。

阿富汗係一個政局好混亂既地方，睇完呢套戲之後，好似用放大鏡將其中一D人既故事放大左，雖然好多人都只係配角，不過悲劇每日都發生，係呢度真係唔敢對將來有盼望，生活好唔容易……呢個係其中一個感到心實既原因。

http://www.kiterunnermovie.com/

拾香紀

終於有機會睇呢本書！

鍾意拾香紀，因為佢帶我搵返一D差少少會遺忘既片段，比我諗起一D人一D事………

裡面提起一D香港歷史 ---

地鐵通車、64事件、蘭桂芳除夕悲劇、李麗珊奧運金牌、傳呼機同水壺大哥大既發明、大大百貨公司、麗聲戲院、歡樂今宵、健美小姐、電視先生、譚詠麟同張國榮既時代、友誼之光.......集體回憶？！

拾香有9個哥哥姐姐，相同既家庭背景，因為大家獨特既性格，唔同既發展，形成獨一無二既故事，就好似你同我既屋企一樣。

係拾香描述之下，每個人既故事眨下眼就由幾歲去到幾十歲，時間過得好快呢！真實生活裡面，同樣過得好快！

一日，拾香媽媽開始忘記好多事，最後腦海裡只記起唔開心既往事；我擔心有一日都會遇到拾香既經歷，心裡有種酸酸既感覺。

最後，拾香比其他人離開得早……原來，回憶，就是愛。

拾香紀：比我有機會好好喊一場！

- 父親連城與母親宋雲，一共有十個子女，順序是大有、相逢、三多、四海、五美、六合、七喜、八寶、九傑（後來將「傑」改為「健」），和我，十香。

- 我在昏迷之中，回想過去種種，我好像知道很多，聽了很多，見了很多，可是我自己所經歷的，如今最是真實。

- 我的死亡正從昏迷裏淡入，而我只能從回憶裏抓住一點生命的痕跡。

微笑Pasta

最近睇完台劇〝微笑Pasta〞，係一套輕鬆愛情劇。

女主角既座右銘：『只要笑一笑，沒有什麼事情過不了』，呢個角色好樂觀，成日都勇往直前。

當遇到因難時，女主角曾經問過：『為什麼今天不是昨天，不是明天，今天怎麼就是今天？』有時唔想面對問題時，我都會諗，如果時間已經過左，或者唔使面對就好啦！不過現實終都係現實，或者呢個就係『經歷』最可貴既地方，一定要自己走過去，先會有成長。

女主角有一種好難得既〝烏龜精神〞，每次遇到困難既時候，都能夠意志堅定去克服，不屈不撓，努力不懈，衝向終點。

另外，最令我感動係佢有一家好好既屋企人，無論咩野事，佢地都會全力支持佢，為佢打氣，相信呢個家庭就係佢充滿力量既推動力。
我都幾鍾意睇呢類劇種，因為總會接收到D正能量！

Earth TV

〝瞬間看地球〞係一個好有吸引力既節目，每次聽到首音樂，我就會即刻望住個電視。

可以即時睇到地球上另一個地方，個種感覺好開心。有D地方我去過，特別有親切感，有D無去過，就會有D好奇，有時又好似發現新大陸，原來D地方都幾靚喎！

好奇怪，我會期望係電視上見到一D熟悉既面孔，可能我個朋友係呢度旅行呢！有時又會當自己去緊旅行，1分鍾都要relax下。當見到香港既時候，又會有D自豪，一個小小既城市，其他國家既人都可以係電視見到我地喎！

呢個節目雖然只係短短1分鐘，但我會好集中精神去欣賞，幾乎次次都會同身邊既人講：『嘩！你睇下，呢度呀……』

如果可以加多D地方，好似拉斯維加斯、日本、泰國、中國……咁就好啦！

其實上網都可以睇到呢個精彩節目，仲可以揀自己鍾意既地方，睇幾耐都得架！

http://www.earthtv.com/

Concert and Talk show

趁假期睇左兩隻DVD，麥當娜演唱會The Confessions Tour同埋林海峰踎低噴飯。

麥當娜演唱會無預期中咁好睇，有D歌佢想帶出社會問題，但表達得沉重左D，好唔relax。不過都有我鍾意睇既跳舞，另外有一首歌Dancers要係D鋼架上面跳黎跳去，好似D體操表演咁，都幾好睇。

林海峰係talk show裡面既說話，有D已經成為大家既口頭蟬，佢都幾捉到觀眾既情緒，表達能力都幾強。係個show裡面，成日都會影住觀眾既反應，影得最多既係彭羚，當佢用欣賞既眼神同笑容望住老公時，相信呢D就係最好既支持啦。