熱辣辣遊長洲

趁放大假，約埋Connie入去長洲行吓。

呢日嘅天氣真係熱得過份，今次係我哋識咗廿幾年，第一次兩個人去郊遊，原本計劃要踩單車、去沙灘坐、四圍行吓、周圍食………結果係熱到唔想郁，最係都只係行咗一陣，食咗一D必食嘅推介，影吓相，跟住就返香港啦！

之後去佢屋企探吓阿MUI同阿MUN，發覺佢屋企越來越似動物園，有狗、有魚、有龜仲有最新嘅成員 - 蜥蝪BB綠豆同芝麻…… ^V^

長洲東灣泳灘

好好味嘅手卷同透心涼嘅凍橙檸

阿MUI同阿MUN

生日@09

唔經唔覺，又到咗生日，今年收到最多祝賀嘅方法係嚟自facebook，呢個平台真係好犀利！

多謝大家喺唔同時間比我嘅祝福、仲收到一D好可愛嘅禮物添！

最估唔到嘅係當會友大會尾聲時，好多人唱生日歌比我聽，多謝各位自願或局住要唱嘅弟兄姊妹，Kenny：我以後都唔會再挑戰你……費事大家又要被迫做一D嘢，哈哈！

雖然嗰一刻好尷尬，不過都好開心嘅！

墾丁寄來的postcard

今晚收到一張由台灣墾丁寄比我嘅postcard。

上年去墾丁時都見過呢D立體postcard，當時無買，原來收到都幾得意架！

多謝兩條魚！

p.s. 上年11月墾丁係大風又落雨，唔知今年嘅墾丁係咪真係天氣晴呢！

中學同學聚會

前一排有中學同學聚會，咁齊人已經係幾年前嘅事啦！

咁耐無見，真係有D期待，好想睇吓大家有無變！

大家見面最鍾意係想當年，結果咩都比人拎返出黎講。

有時人都唔鍾意講以前，尤其是衰嘢，不過面對舊同學，係唔會有秘密，可能因為咁，對住大家都可以放鬆D！不過只係止於過往，依家嘅事大家都係有所保留。

呢種關係其實都幾特別，識咗廿幾年嘅感覺又真係好值得珍惜嘅！

賽後檢討嘅結論係：原來我地個班都幾多靚女，仲要到依家都KEEP得好好！

真係令人羨慕呀.........

越洋通話

今日打比Pionne，跟Isaac & Ian講咗一陣，其實同小朋友講電話真係有D難度。

我：Isaac，你食咗飯未呀？
Isaac：……………
我：Isaac，你有個新公仔呀？
Isaac：……………
Pionne：佢行咗去第二度呀！
(我即係同緊空氣講野？！)
由於Ian未識講嘢，我係呢邊不停問不停講，但只係間唔中聽到佢嘅BB話，究竟佢係回應我？定係無理我呢？感覺好似自己同自己講嘢，真係唔係好慣！

雖然Pionne有形容當時嘅攪笑畫面比我知，不過睇唔到佢地個樣，都係爭D！

最後，醒目嘅Pionne，用相機拍低我地嘅電話對話，因為係用Speaker傾，所以呢段片會有我嘅聲音演出，好期待，好想快D睇！

Isaac & Ian

上星期同Pionne傾電話，Isaac同我都傾左一陣(仲有2個月就3歲啦)。

佢一邊講自己既事，一邊叫住〝契媽〞，雖然佢未必知呢個稱呼既意思，不過都令我好開心。

可能佢心情好，今次特別多野講，仲識得向我投訴媽咪唔比糖佢食。


至於Ian，由出世都依家都未見過真人，真係有D難想像佢有幾大個，出左幾多隻牙，識講野未，識行未？？？

不過佢同正正係同一個月出世，所以見到正正真人，再加上Ian既近照，都可以有返D近距離既感覺。
Ian 一歲生日
第一次游水，驚驚！

開始enjoy啦！

Thank You !!

多謝大家既SMS、電話、留言、email、facebook message、禮物、仲有陪我食飯……

話晒都過左好多年生日，對呢個日子既期待真係唔大，不過生日其中一個意義，就係提醒我身邊仍然有好多朋友，願意為自己付出時間、錢、仲有心思………

仍然有生命氣息，仲有朋友係身邊，係一件幸福既事，呢D都唔係必然，要好好珍惜！

釣夜魚

尋晚去左深井同細佬一家釣夜魚。

釣左一個鐘，我都有D收獲，有4條魚毛呀！其中一條係雞泡魚，釣上黎個一刻佢個肚大到不得了，一除左個魚勾，即係縮晒。本來我釣到隻蟹架！不過佢太大力，魚絲都斷埋！

最後，細佬媽咪就真係釣到隻蟹啦，好犀利呀！

邊釣魚邊傾計，環境靜靜地，又有D海風吹下，都幾舒服，釣到魚又有滿足感，呢項活動都唔錯。

不過有時又好殘忍，勾住條魚個口，有時仲勾住佢隻眼，最後嫌佢太細條，又掉返落水，但係已經受晒傷，落返海都係死路一條。我地都係慣性將自己既快樂建築係人地既痛苦上！

各位爸爸媽媽，辛苦晒啦！

做父母真係唔簡單，雖然我同Isaac只係出左幾次街，不過見到要照顧佢既事真係唔少：

- 諗下同佢食D咩，又要剪開比佢食，餵得佢自己都唔使食啦
- 要搵地方換尿片
- 佢四圍跑既時候，要追住佢，驚佢有危險
- 扭計既時候唔可以淨係鬧，有時要同佢鬥智，分散佢注意力
- 搭地鐵最好搵有電梯既出口，重有要夠大既出閘機，有幾次睇住Eric抱起架BB車上落樓梯，Isaac梗係覺得好玩啦，爸爸其實好辛苦架！
- 依家有33磅既Isaac，我只係抱左佢5分鐘，隻手已經痛左兩日，爸爸媽媽真係可以練得好大隻
- 點去教導佢認識呢個世界，成為一個好孩子，都要花D心思

依家對於團契裡面既爸爸媽媽，多左一份了解啦！

有人話仔女係父母眼中，無論幾多歲，永遠都係主角；
而父母係仔女眼中，過左童年時代之後，只會係一個配角。

雖然呢句說話好真，不過我知父母偉大既愛，係最大既推動力，令佢地唔計較咁去照顧仔女一生一世。

各位爸爸媽媽，辛苦晒啦！

Pionne's family - See U !!!

總係覺得時間走得好快，今日Pionne一家起程返美國啦！19日眨下眼就過左，都無做過D咩，又要走啦！

星期一晚同佢地既家人一齊BBQ(預祝中秋節)，呢晚好開心，我地影左D整古做怪既相，最難得係阿麻同伯母都好投入同我地一齊影，熱熱鬧鬧好高興。

尋日同佢地行左一陣街，終於到左分手既時候啦。

Isaac話：『契媽bye bye』，比左個big hug 同goodbye kiss我，跟住同Pionne都有big hug，呢D動作都意味住大家再次天各一方，唔知等幾耐先再見啦！


今朝係公司諗起佢地夠鐘起飛啦！大家又係唔同既地方繼續原有既生活，一切又回復原狀！唔知下次見到Isaac，佢仲記唔記得我呢？


Isaac Smile

乾杯！

Pionne - 細佬大婚之喜

今日係Pionne細佬大婚之喜，夜晚去到酒店，見到佢地一家人開開心心，都好戥佢地高興。

識左佢地一家都十幾年，覺得細佬真係變左好多，真係大個仔啦！今晚佢預備左一封信比爸爸媽媽，本來由司儀代佢讀出，不過咁感動既時刻，最後都係由佢自己讀番！

係信入面感激父母由細到大既悉心照顧，雖然現場無感人既眼淚，但我就好欣賞佢呢份心意呢！我認識既細佬好少表達感情，真係無諗過佢有感性既一面，人大左真係唔同D喎！

當然Isaac係呢晚都好搶鏡啦！

飲杯！

Pionne's Family

Pionne同老公仲有大仔Isaac返左香港渡假，雖然會留19日，不過又要返鄉下，細佬結婚，有D親戚返左黎，所以都好忙。等左9日，終於可以同佢地去玩啦。

呢兩日請左假，第一日我地去左山頂，依家凌霄閣摩天台起高左，要收入場費先可以上去，因為太大霧，D景麻麻地，所以無上到去，行左一陣，搭返纜車落中環。夜晚去左花園街〝通達〞食魚肉翅，行埋女人街，9點左右返屋企，一上巴士，我就覺得好疲倦。

第二日朝早先同我媽咪飲茶，之後我地去左尖沙咀。未出發之前，我發覺帶左相機但唔記得帶電，好沮喪！Pionne話用佢部機，點知……好快都無電，極度沮喪！呢D時候無相機真係有D遺憾，唔可以將珍貴時刻影低。無辦法啦，都照出去行下，去到九龍公園，諗起佢部電話都有200萬像，都好啦，可以同Isaac影番幾張相。黃昏約左Sherry係大窩口個公園同Isaac玩，小朋友真係充滿活力，好似唔使停咁。公公話Isaac係香港就開心，返美國之後，好快就冬天，到時又落雪又凍，就無得出街玩啦！

兩歲既Isaac真係好可愛，唔怕陌生人，又鍾意笑，好易同你熟，睇住佢跑下跑下個樣真係好得意，佢依家識講好多野啦，仲識叫我〝契媽〞添！




跑呀跑.........



玩車車

好辣！

比你食！

長洲深圳一日遊

上星期五放左一日假，同三個朋友去玩一日。

大家約呢個活動，由提起到實行都用左幾年時間，大家都忙囉！不過都幾期待呢一日架！

我地呢個組合有個特色，有時大家會搶住講自己既話題，仲要係當你講既時候，第二個又講， 最 後四個一齊講，哈哈！其實大家都無心聽對方講咩，人地話三個女人一個墟，我地四個加埋就……不過，呢種無拘無束既相處都幾舒服呀！

一早入去長洲飲茶，好嘆好relax咁唔使受時間限制，好隨意咁經過建道神學院(個刻諗起阿May，唔知佢會唔會係度呢？應該唔係囉！)，行左去南氹灣，係涼亭傾左好耐，最攪笑仲一齊做瑜珈，JW突然建議上深圳按摩，都好即興喎！

最後等埋Dr John放工，一行五人返大陸，最後返到香港11點，出旺角食埋飯，1點幾先返到屋企！

明明話relax一日架！點解仲衰過返工既！


p.s. 原來係深圳過關都有〝e道〞，因為我未申請，只好係counter過關，不過仲快過佢地喎！

Isaac & Ian

第二個契仔Ian係3月24號出左世啦，Pionne send左佢同哥哥Isaac既相比我睇，一路睇既時候，心裡面就諗：

眨下眼，又過左10個月，Ian出世啦！

Ian真係可愛啦！
Isaac好靚仔喎！
全家福，好幸福呀！
Pionne抱住佢兩個，感覺真係好溫馨呀！
唔知Isaac知唔知呢個BB，就係將會陪佢一齊行人生路既好兄弟呢？
佢地見到我時，唔知要warm up幾耐先肯同我玩呢？

一直都只係睇佢地D相，仍然覺得好唔真實，要等佢地係美國返黎先可以相信呢個事實。

生命真係好奇妙！
神安排既真係好特別！

哥哥Isaac，已經17個月大啦！

細佬Ian，我得8日大咋！

生日快樂

尋日收到好多祝福，有透過電話、面對面、越洋、Email、SMS、Voice Mail、禮物、食飯(包括早午晚餐).......多謝晒大家既心意呀！其中幾個人令我有D感受，同佢地都係有一段日子無聯絡，但係呢日送上祝福，特別感動架！

其實生日亦係一個睇睇有幾多朋友仔記得自己既時候，哈哈！ 不過純屬參考，呢個數據無一定準確性架。如果下次我係你生日既時候無表示，只係因為我唔細心又無記性，希望大家原諒啦。

可能人大左，對生日越來越無特別感受。前兩日，有人提起，我先記得原來生日已經到啦！以前會為生日既來臨，有D興奮，依家無啦。但係都會驚正日無人同自己食飯，有時D朋友以為我呢日會好忙，所以就約第二日，如果最後無人約就慘啦，好似好可憐咁。有人話可以同媽咪食飯慶祝，不過媽咪話佢淨係會記住我舊曆咋！今年都感恩，有幾個舊同事一齊食飯慶祝。

另外，今年生日都有D特別，係前一晚，當仲有5分鐘就踏入11號既時候，我因為食錯野，又嘔又屙咁迎接新一年，真係要注意健康啦。

手信

手信 – 即係親手寫既信。

自從email流行之後，大家都好少寫信比人，或者收到人地既信啦。

自從Pionne去左美國之後，最初大家都有寫下信，後來只係打下電話或者email。其實要攞起枝筆寫封信真係唔容易，仲要攞去郵筒寄，需要既動力真係唔少。

不過近呢幾個月，Pionne都有手信比我，話我知佢既近況。每次收信都好開心架，親自執筆個份情又真係唔同email既！真實D，距離近D，親切好多，好有heart架！不過我回信既動力就唔夠，有時都係用番email咋！真係好慚愧！

我問佢點解咁有推動力去寫信，佢話因為以前買左好多信紙，實在太多存貨，好想快D用晒佢地喎，哈哈………咁都得。其實我都有好多存貨架，希望你地有機會收到我既手信啦！

大會堂演奏廳

上星期日去左香港大會堂演奏廳，欣賞一間琴行既師生演奏會。一位舊同學係呢間琴行教鋼琴已有很長時間，呢晚佢係壓軸嘉賓。其實上年都打算睇佢彈琴，不過撞左Kennis婚禮，所以去唔到。

演奏會係7點開始，我同Josephine已經唔太早入場，8點左右先入去，點知一睇份場刊就大件事，佢係第71個出場，有排等啦。最後11點先到佢表演，當時都幾疲倦，精彩既演出真係唔多，不過為左支持佢，無問題，OK既，結果佢既演出都好成功，當佢彈完之後，大家既掌聲明顯比之前熱烈好多。

呢位同學對彈琴好有heart，雖然我唔識音樂，亦唔知真正欣賞既方法，不過佢彈琴既時候，係好流暢，好熟練，好有自信，好有heart咁去表演，令人好欣賞。佢對彈琴好有熱誠，佢好願意付出時間去練琴，又會搵好既老師不斷去學習，能夠將自己既興趣繼續發展，又能夠成為職業，其實都好幸福架。

睇到佢對自己既選擇咁投入，咁認真既態度，令我都有D反省。相信每個人心裡面都有一D好重要既人或事，我地有無真係用心去尋求進步呢，我地又願意付出幾多去維繫，去突破呢？同神既關係亦都一樣，我地曾經付出，又或者願意付出既，係唔係真係夠呢？