LPY 5S2 Reunion

由於有Facebook嘅強勁尋人功能，可以搵返好多失去聯絡嘅朋友，結果LPY 5S2一班舊同學聯絡返，上星期五約出黎重聚食飯。

未出黎之前有D緊張，可能太耐無見！而且唔係同所有人都熟，又唔知大家變成點，會唔會無話題呢？

當我去到酒樓附近，心裡面真係要多少少勇氣走上去！哈哈！

十幾年後再重聚，感覺好得意，大家唔單止外表有改變，內裡都唔同咗，以前我覺得係曳係串嘅，依家都變返好人，仲好攪笑。其實明明識咗好耐，久後重逢又好似重新認識咁。

大家嘅話題，離唔開以前發生嘅趣事、大事、情史、依家嘅生活、無黎嘅同學近況……有D事真係唔講都唔記得，講返又再成為大家嘅共同回憶。

讀書時代，可能大家都比較自我唔理人感受，唔識同人相處，唔多唔少都令人受傷害，經過十幾年琢磨，大家都成熟咗, 唔再係小朋友，對大家嘅關係多咗份尊重同珍惜，好唔同呀！

學校生活係少年時代嘅重點回憶，有一班同學一齊成長，面對每日開心 / 唔開心，輕鬆 / 辛苦嘅時間，雖然唔係每一個都好熟，不過呢班同學又的而且確同自己走過重要嘅人生階段，所以呢份感覺真係好微妙。

重聚為咗重新建立關係，雖然未必會經常見面，但都都係一個好開始，大家能夠認識唔係必然，呢份情誼係值得珍惜。

呢餐飯大家都食得好開心。

開學啦！

開學啦！

暑假正式過去啦，呢個假期對我黎講本應無特別意義 (做左野都咁多年囉！)，但可能同馬可既團友仔見多左，所以暑假完結都有D怪怪既感覺，好似一切都要回復原狀，之前個幾月既暑假，就好似發左場夢咁……不過都希望團友仔同神同人既關係可以keep住……

我都返學啦！今季報左〝青少年基督教教育〞，每個禮拜三上堂，一直上到12月底。

今日本來都幾疲倦，但返到學院又幾精神喎！可能對呢科都有興趣，而且都想了解多D青少年既特性。實在依家係馬可既事奉，都好需要有多D input，想做好D呢！

課程要求睇4本書，嘩！！希望能夠完成啦！

〝個人成長〞(八) ~~~ 人生劇場

人生劇場會邀請唔同既人，將最深刻，最影響佢地既成長片段，再次演繹出黎。

主角由幼稚園開始，每個人生階段，只要佢覺得係重要既，都會預先寫好比牧師睇。當晚就搵同學扮演佢身邊既人，將呢個故事做出黎。

第一位同學既人生，都遇到好多唔開心既事，讀書唔好，細細個要做野，成人被人炒，仔女身體都有問題，老公離開佢，好似苦情戲應有既劇情都係佢身上出現咁！我知道社會上仲有好多悲劇，或者今次比較埋身，感覺好真實。

到左最後，大家可以逐一出黎向佢鼓勵：『你好堅強呀！』，『繼續努力』，『為你祈禱！』『我知道你所受既唔會枉然，神會藉住你去幫助其他人。』………

呢位同學認識耶穌之後，心裡面改變，多左神既力量去撐住，比佢可以繼續行落去。佢依家既祈禱係想知道神會唔會比佢去宣教，呢份心意，想信神會祝福。

我都要交呢份功課(不過唔使做出黎)，到我認真去回想既時候，唔知我既人生會有幾多片段，已經係不知不覺間，好深咁影響我呢！

〝個人成長〞(七) ~~~ 9型人格

9型人格裡面，我應該屬於第9型--和平型。一邊睇D分析，發現有好多都形容得好貼切，有D心態正正就係我既心聲添！

每種型格都有唔同既優 /缺點，當對自己了解多左，就可以用呢種個性幫助自己成長，避免性格入面既缺點同負面情緒所造成既衝突。

之前都有一D朋友指出我性格上既缺點，從今次既資料裡面，希望比自己多D幫助啦！

9型人格測驗

http://www.bt4u.com/calls/analysis/enneagram_start.jsp

9型人格分析

http://www.yipsir.com.hk/EQ_Handouts/PDF_Documents/Enneagram_(Handout).pdf

〝個人成長〞(六) ~~~ MBTI 16型人格

MBTI (Myers-Briggs Type Indicator)係一套性格測驗，做完D題目之後，就可以睇到自己傾向邊類型(外向型、內向型、辨識型、直覺型、理智型、感性型、決斷型、熟思型)，屬於邊種性格(總共有十六種性格)。

我有兩組類型既結果都好相近，其中一組係『外向型同內向型』，初部結果係傾向『外向型』。但當我地個組分享既時候，發覺大家既心態同表現都好被動，似乎係『內向型』多D。老師話，係Work Mask (工作面具)既情況之下，『內向型』既人都可以好外向。即係當一個人意識到自己既身份，係當時既場合係需要主動D既，因為呢個責任，佢就可以變得好主動。

MBTI反映個人性格類型，對個人成長、發掘性格潛能、改善人際關係，了解自己係壓力下既心理反應，都可以作出幫助。

結果顯示，我係一個『ISFJ』既人。

http://www.youtheart.org.hk/index.php?id=218

〝個人成長〞(五) ~~~ 出生次序

上星期講既係出生次序對性格既影響，屋企排最細既，一般都係家庭娛樂家、反叛、沒耐性、脾氣暴燥、衝動等.........

原來我又真係有呢D特質(雖然唔算勁)，朋友同事未必領教過，因為我對住最親既人先會發作。

或者做最細既總以為自己有特權，總有人讓自己，有時未必控制到自己，過份左都唔知。當自己做番一D野令屋企人發笑既時候，又以為已經彌補左激嬲人既罪行，重重覆覆。

呢個就係我啦，唔該改下啦！對住自己最親最錫既人，應該付出多一D忍耐，多一D愛呀。

〝個人成長〞(四) ~~~ 家庭圖延續篇

今堂繼續畫〝家庭圖〞，要將家人既性格，關係表達出黎，從中發現一D共通點或者互相既影響。不過有D表哥表姐，我真係同佢地唔熟，完全唔知佢係一個點既人。

有一個女同學，同我地分享左佢好複習既家庭圖，仲有一D不愉快既過去，大家讚佢好勇敢同坦白。

有人因為從小缺乏父愛，大過之後就好想搵一D大自己好多既人發展，就算分手，都好自然去繼續搵呢種伴侶。

有人因為爸爸係一個好孤寒既人，大個之後，唔想好似爸爸咁，所以對仔女好疏爽，但又過份左，雖然同佢地關係好好，不過佢地又唔識節制，變成〝大洗王〞。

有人屋企有7兄弟姊妹，雖然排得細既，但因為對上的兄姊都係一D無主見、只顧自己、唔理屋企事既人，形成排第5既佢有一種剛強，責任心重既性格。

係大家既成長裡面，發現父母關係、有幾多兄弟姊妹、佢地既性格同態度，真係好影響我地成為一個點樣既人。

〝個人成長〞(三) ~~~ 家庭圖

今次要畫家庭圖，要將我同以上兩代，所有親戚既關係描繪出來，亦要知道佢地既性格，大家既關係。



平時我同親戚既來往唔算密，要知道佢地既性格同關係，都要花D時間做資料搜集，結果知道多左長輩既往事，仲有親戚之間既恩怨，呢個練習比我對家族既了解都多D。由於少接觸親戚，有時都覺得慚愧，同一家人唔係應該多D溝通咩，反而時間放係其他人身上仲多。

家庭對我地成長同性格既形成都扮演好重要既角色，當見到下一代時，就會提醒住要盡力做好親子關係，做好榜樣，唔好忽略對小朋友潛移默化既影響。

〝個人成長〞(二) ~~~ 兜兜轉轉！

上次經過心理調整後，最終都無轉到班，懷住期待既心情等返學。

個朝早有個留言，係神學院留比我：『你上星期要求調班既事，已經處理好啦，今晚可以返譚牧師個班。』
個一刻既心情係 『……吓……可以....轉……到……班……呀！』其實我已經預備好心情返另一班，咁………我又要調較多一次心情啦。估唔到上次break時係office既要求，佢地真係有跟進喎！

即刻打比余姊妹，睇下佢點講，感謝神，佢既說話比我好大安慰：『算啦，你已經學到你要學既野啦！』又係呀，上星期學左放手，願意繼續留低，都算係上左一課。

今次唔再轉啦，最終都係返去譚牧師個班。

〝個人成長〞(一) ~~~ 最好安排？

第一日返學，入到課室，成100人讀呢班，好多人喎！譚牧師話今次好多人報名，仲有50人係另外一班。開始左大概15分鐘，正當投入既時候，另一班既老師話唔見左D學生，呢一刻我先發現原來自己唔屬於譚牧師個班。

其實最初決定報讀〝個人成長〞，其中一個原因係姊妹話譚牧師教得好。依家攪成咁樣，心裡面好唔舒服，雖然身處係另一個班房，但就不停諗點樣先可以返去譚牧師個班。去到Break既時候，我都係決定到辦事處要求轉班，職員叫我同譚牧師講聲，如果佢ok，我就可以轉。去到佢班房，仲未有Break喎，唯有返去自己度上堂先啦，放學再搵佢，我一定要試下！


上堂時同神講，『如果你覺得我應該留係呢班，你就改變我心態啦！』。

我地要分組畫畫 (將聯想到安全感既事物畫出)，望望下，呢班人少少，D同學仔都好似幾nice，可能無咁多人，環境安靜D，思想既空間都多左。過左一陣，心裡面似乎有所決定 ---- 留係到啦，心裡面有種平安既感覺。

唔知往後既課堂會點，但神既然係短時間內改變我心情，相信呢個安排都會係最好既！

返學啦！

經過姊妹既鼓勵，終於〝的〞起心肝，係伯特利神學院報讀〝個人成長〞，逢星期二返學，同Emily & Pocky成為校友啦。

1月頭收到佢地既確認信，信封面以〝同學〞稱呼我，每個同學仲會有自己既信格，個種感覺好特別，有D開心，又好有呢間學校一份子既感覺，好有推動力去返學呀！

雖然未有諗住讀一系列既輔導課程，但都希望先係〝個人成長〞裡面探索一下，以往既成長歷史對我造成點既影響？我可以點去配合或者改善，令我對神，對人，對自己可以有更多進步既空間。