CHANGE

傳咗一段日子嘅收購傳言，終於係上星期三正式公佈落實。

之前收到唔少路邊社消息，所以大家都消化咗，氣氛上唔算太大影響。

有D同事係舊公司經歷唔止一次收購，我哋都只係第一次咋，可以想像係有好多野要跟進同處理。

前景如何大家都唔知，不過一間公司有變動係好普遍現象，總要接受環境唔可以掌握，所以選擇用平常心面對。

你是個正常的上班族嗎?

中咗7樣.......經常發生係第5同第7點，我嘅朋友，請原諒我總是遲到呢!!!

原來我係一個好正常嘅上班族，不過我情願自己變得唔正常.........

鮎魚前夕

超級強風『鮎魚』越黎越靠近香港，今日公司都好似準備定會打風，話題同心情都係環繞呢條魚。

Lunch之後，全公司電腦出現故障，連電話都有問題。結果，全公司分兩種人，IT同GA同事好緊張咁救亡，預備一D善後工作，而其他同事就暫且可以休息下(雖然知道一定大把手尾要執)，Hea下傾吓計。

最後，可以好準時6點就預備放工，我地都帶住輕鬆心情離開。見到一D平時要OT到8點幾嘅同事都開開心心放工，真係有D感觸。

其實正常嘅作息時間先可以培養到健康情緒，可惜聽日大家又要打回原形，身邊同事又會帶住耗盡嘅負面心情返工。

你的日子如何 力量也如何

最近公司有D人事變動，結果我既崗位又再次調動，其實都係轉返之前嘅部門。

之前一直都怕做管人嘅崗位，而且呢個部門要面對嘅客人(agent)同工作都唔容易，心裡有一刻擔心過，不過都無得選擇架啦！

有D人知我轉過去，第一句就祝我好運，因為佢哋覺得呢個唔係好位。我心諗：又唔係咁恐怖啫！

不過都曾經係counter接walk in enquiry，由2點到6點人流係無停過，水飲唔到，廁所去唔到，氣都爭D透唔到。放工之後先覆email、做follow up，結果放工時靈魂已經不知所蹤。

神的確係有恩典！

首先係同兩位同事都合作愉快，自己都做到應有嘅本份。
客人–有D真係唔易對付，不過都還可以。
新嘅文件工作–係我其中一樣擔心嘅事情，但結果都好順暢，亦都睇到自己有進步。

雖然無咗個無敵海景係背後，的確係爭咗少少，不過仍然享受依家嘅工作。感恩！

呢句金句係我嘅幫助：你的日子如何，力量也如何。

垃圾車定律

以下是一個小故事：

有一天，我跳上一輛的士，打算到機場。

正當我們開上正確的車道時，突然一輛黑色轎車從停車位開出，正好擋在我們前面。的士司機立即踩剎車，車子滑行了一小段路，剛好閃開來車，兩車之間的距離就只差個幾英寸！錯的顯然是對方，但那輛車的司機反而兇狠地朝我們大喊大叫。

我的的士司機只是微笑，對那傢伙揮揮手，表現得很友善。

於是我問：「你剛才為什麼那麼做？明明是他的錯，那傢伙差點毀了你的車，還可能害我們受傷送醫院！」

的士司機解釋說：「許多人就像垃圾車。他們到處跑來跑去，身上充滿了垃圾、充滿了沮喪、充滿了憤怒、和充滿了失望。隨着垃圾堆積，他們終須找個地方傾倒；有時候，我們剛好碰上了，垃圾就往我們身上丟，所以，不要介意，只要微笑、揮揮手、祝福他們，然後繼續走我們自己的路就行；千萬別將他們的垃圾擴散給同事、家人、或其他路人。」

的士司機的話讓我驚異和深思，這是我們人生應謹記的「垃圾車定律」。

成功的人絕對不讓垃圾車接管自己生活當中的任何一天；人生苦短，早上醒來絕對不要帶着遺憾。

所以……仁愛對待與你以禮相待的人；不用去理會那群無理取鬧者。過一個奇妙的、沒有垃圾的日子吧！

今日接到另一部門嘅求救電話，有位agent唔滿意佢哋嘅答覆，拉鋸一段時間後，情緒越發高漲。當我打比佢嘅時候，雖然知道佢唔係發我脾氣，不過都要受晒個一刻嘅大聲疾呼同咄咄相逼嘅態度。

睇完以上嘅故事，慶幸自己今次無將垃圾傳比其他人，反而成為一個有意義嘅垃圾站。

香港人都需要抖吓氣，唔好叫壞脾氣成為一個惡性循環。

狗仔拜年

上年同事帶咗兩隻Toy Poodle 返公司拜年，一隻男仔一隻女仔，好可愛！

嘉嘉

榮榮

今年好期待再見到佢哋！而且仲帶埋一對仔女上黎公司呀！

以前只係BB嘅嘉嘉成熟咗！

唔見一年，榮榮爸爸肥咗好多！

黑色係哥哥Pooh Pooh。右邊係妹妹Winnie，同媽咪好似樣呀！

交換禮物

有時要諗一份人人都合適嘅禮物都唔容易。

今年我哋部門先抽人名，大家可以有D目標去買禮物。

我一早將想要嘅禮物暗示 + 明示比負責人知，所以今次交換禮物對我黎講特別期待，可以收到一份自己鍾意嘅禮物。

前一排想買一隻STARBUCKS杯，不過要自己掏腰包又唔係好想， 今次收到呢份禮物真係開心。

唔想返工的理由...........

有時，半夢半醒之中，真係會認真去諗，發掘吓究竟邊度有唔舒服呢？

跟住理智同感受就開始交戰啦...........

天書沒有了 - 武功廢掉了

唔知係人為定電腦故障，一個重要File裡面嘅資料係幾秒間無晒………

呢D係我幾年來，辛辛苦苦儲埋儲埋應付每日工作嘅資料，呢本天書無咗，即係武功廢咗一大半，好似變返一個新人添。

搵IT研究過，File唔可以復原，唯有接受痛苦經歷，面對現實。

可能係一朝早發生，又或者係間中都試過要由頭打返晒D資料，又可能係逆境商數高咗，心情竟然無太大跌盪。

感恩心裡面不至於抓狂，就當係一個機會重溫D資料啦。

呢個故事都係要教訓我唔好懶，一定要做好Backup。

搬新位

公司分唔同階段大裝修，我哋個邊剛剛完成，終於搬到新位座啦！

裝修之前，最擔心係無咗個維港窗口位，雖然平時好少望，不過無咗一定會好可惜。裝修期間，發現新位置將會十分開揚，前面對住大門口，左面係同事上網位，完全開放無Partition，其實我個部門真係要有D私隱架！呢個設計令我有D擔心，預計會面對好多不必要嘅問題。

幾經爭取，前面將會加番一塊磨紗玻璃，總好過咩都無！

不過經過一星期，裝修事件比我有D新嘅體會：

尋日係公司影低自己個新位時，發覺雖然設計上唔夠完善，不過都已經好好，尤其是我最想保留嘅窗口位，比之前更大更舒適。係呢個星期自己總係為〝無嘅嘢〞抱怨，但就忘記咗自己〝有嘅嘢〞已經比好多同事好。

環境總會變，亦都唔一定跟我哋意願相同，為自己爭取之餘，都唔好忘記有一個感恩知足嘅心。

我個位前面就係大門口, 所有同事客人經過都會見到我

左邊就係客人同AGENT上網嘅位置

我哋部門個位 我個位窗口位

接受不了的mindset

阿頭傳遞一個message，希望同事對返工嘅心態可以調整一下 -- 同事應該將公司放係最重要位置，隨時有OT嘅準備，如果有需要，就算假期都要返。

我明白以公司立場有呢種想法唔出奇，但係阿頭個人心態都好認同呢個想法，我就真係接受唔到。

佢認為以一個team去睇，工作要一齊做，有team spirit，若要犧牲私人嘅時間同享樂都唔過份，工作係生活上好重要，應該全心放係公司，佢希望我哋每個subteam都有呢種mindset。

佢要求嘅mindset我應該調較唔到，更加唔會當係理所當然。大家以team spirit係工作時間內盡力係OK，不過私人時間(尤其是假期)就唔應該剝削，佢要嘅mindset真係有難度。

或者佢只係以Leader身份，所以講呢種說話，否則我真係好無奈，如果人生嘅全部只係為份工都幾可悲。

p.s.睇黎我真係好唔鍾意OT，有關感受原來之前已經打過兩次……

Work @ Home

當香港有H1N1確疹之後，公司就開始實施work at home安排，每個部門都有一部分同事留係屋企開工。

留係屋企嘅好處可以慳返車錢同食飯錢，又可以訓到最後一分鐘先起身，唔使換衫，都幾好。

雖然好似無王管，其實老闆睇得重緊，因為大家只係用屋企部電腦遙遠控制公司部機，所以同事個位雖然無人，但個畫面就不停做緊嘢，咁就更加清楚有無人偷懶，如果係無其他騷擾之下，做嘅case比平時少，真係唔知點算，不過有D同事話屋企部機好慢。

遙遠控制呢個科技都幾得意，有個同事話用緊mouse個時，發覺有人係公司攪佢部機，好似同佢鬥力咁。

平時係公司，大家都係不經意望下你做緊咩，而家好似名正言順比人睇住咁，雖則大家都唔得閒成日望，不過都係有D壓力！

而且所有文件都keep係公司，屋企做嘢都幾唔方便，我可以留係公司都係一件好事。

聽聞公司會係聽日回復正常啦！

p.s. 我係留係公司做嘢架

小手工 - 百家布

最近公司攪咗一個活動，鼓勵每個同事都參與，設計一張百家布，最後成為一張百家被，藉呢個活動捐錢幫助受危疾困擾嘅家庭。

好耐無整呢D勞作，係工作時間做吓小手工都幾開心喎！

我嘅作品，一睇就知我只係志在參與！

OT文化

同一個朋友傾計

我：你多數幾點放工呀？
朋友：8, 9點啦！好多野做好忙呀！

但我覺得佢又唔太抗拒OT喎，可能已經慣咗啦！不過佢結婚無耐咗喎！

我 ：唔使陪屋企人咩？
朋友：以前都係咁架啦！

即係另一半應該有晒心理準備，無得抱怨！

依家要OT真係越來越普遍，而且仲未必有得claim $，只係需要你個人留係度做嘢。大家都係為咗保住份工，又唔可以比人以為係冗員，可能係一種價值嘅表現，有時早走過D同事會有內疚感，唔單止自己，連屋企人都好接受呢種現實，唔敢係自己面前有怨言。

OT亦都成為一個好漂亮嘅藉口，當遲到，唔出現，無心機，黑面嘅時候都可以理直氣壯同人講呢個理由，可能仲會得到人哋嘅安慰。

我唔想係不知不覺間，當咗呢樣係生活必要嘅一部份。

其實私人空間真係好重要，點忙都好，都要搵辦法比自己休息吓平衡返，調較方向，唔好任由自己成為一個工作機器。

屋企人同朋友都一樣重要，唔好忽略佢哋呀！尤其是年老嘅父母，可以陪佢地過健康生活嘅日子真係唔多！

聽聞公司將會係大家嘅私人時間攪活動........oH.......

Lion Dance

每年公司係農曆年都有舞獅安排，不過我就無咩興趣，其實真係好嘈！

不過今年發覺佢地都有D新意，幾欣賞佢地嘅心思。

舞獅途中，佢坐咗係度好耐，當大家諗緊發生咩事之際.........

終於起身啦！而且地上面多咗D嘢.....

原來佢地用幾個柑砌咗〝大吉〞兩個字出黎，唔怪得咁耐啦！

效果唔錯喎！

09' Annual Dinner

今年公司Annual Dinner主題係〝Colorful Carnival〞。認真到有入場劵，可以留為紀念！

一入場就有D爆炸頭、羽毛、面具…比大家裝身，有小丑表演又有巴西女郎做佈景板同大家影相，有攤位玩掟階磚，又有爆谷同棉花糖食，都幾努力去營造嘉年華氣氛！

MC係Harry哥哥，佢嘅魔術同口才都唔錯，成晚氣氛都好開心。
睇住張檯係半空飛黎飛去，全場都睇唔到任何破綻，好犀利！上兩年都抽唔到獎，今年終於再次擠身於90位得獎者之內啦！哈哈！

假期OT

聖誕節兩日公眾假期要返工, 除夕要OT到夜晚11點，依家開始喉嚨痛，感冒開始啦.....

知道要係呢D日子OT，最初無太大hard feeling，不過對住部電腦成日係咁做，最後個人吽晒，感覺係好攰，身體好攰，個心都好攰。

以前係公眾假期聽收音機，D人成日都點歌比返緊工既朋友，因為大家都覺得假期返工好淒涼。

我覺得無咗自己時間，無得休息，無得陪家人，無得見朋友，心情被影響，仲要做到病，如果只係為份工，都幾唔抵。

不過當你個team所有人都要做，唔通自己可以豁免咩！

聽丘女俠講，新公司無year end closing，真係好呀，唔知有無多個位呢！哈哈！

可以的話，大家要平衡生活，見多D家人朋友，比多D空間自己，對自己好D呀！

清假

呢個月終於比我清一部份假期，其實都係得四日，不過由於未係full team，最好唔係連住放。

最後每個星期放一日，呢個禮拜放兩日，不過中間一日要返工。

結果覺得好傻仔，放兩日假期中間返一日，好似無放假咁，返工個日要跟返之前嘅野，放工又要清晒D嘢先走得。

下星期仲有一日假，希望可以好好享受！

Training @ 惠州

剛過去嘅星期六日，公司攪咗個Training，一行三十人上咗惠州棕櫚島渡假村。

兩日一夜嘅行程，透過分組遊戲同討論去training，都算輕鬆，起碼唔需要夜晚做功課第二日present。

Training嘅重點係Team building同Mindset，雖然有D人覺得只係一套理論，實踐唔容易 (因為同事之間太多利益衝突)，不過我覺得有positive mindset始終都係好嘅。

我地一去到resort，就去training，環境始終都好有國內feel。返到酒店房已經天黑，一開門，第一個反應係……

嘩！好靚呀！好有泰國resort嘅感覺！

安排我哋住係湖景別墅式房間，好大，裝修好relax，房出面仲有地方坐，最鍾意個廁所，可以好舒服咁浸浴，點埋香薰實在係一大享受。 因為roommate病咗無嚟，今次一個人霸晒間房，有人問我怕唔怕，其實唔會，反而覺得好自由。

夜晚行出去見到天空好多星星，係香港好少機會見到咁多啦！

第二朝早D起身，欣賞吓附近嘅環境，真係好舒服，仲可以係房出面坐低睇下書，默想一陣。

今次嘅training，雖然有D同事反應唔太好，有D又覺得去完好攰，不過我覺得呢兩日所學習所體驗嘅，總有值得欣賞嘅地方。

重量級首領

短時間內，剛轉出黎嘅同事都離開咗，結果由重量級首領出黎坐鎮一排。

原來面對佢都有D緊張，不過可以係佢身上學吓另一層次嘅技巧都唔錯，都算係一個新嘅推動力！

下一步係點，真係無人知，肯定嘅係神已經預備好，要學習交託！