海泉灣 - 充電之旅

終於可以連續放3日假，決定離開香港，結果去咗珠海海泉灣。
溫泉係今次嘅主打節目，由於兩日都凍凍地，所以特別舒服。

第一日下晝4點入場，結果係裡面按摩 + 食飯，夜晚11點先離開。

第二日再去，朝早11點去到下晝5點，每次都話留兩三個鐘，結果都係唔捨得走。

呢度有80幾種溫泉，包括室內同室外，我最鍾意係一出去個露天大溫泉，有張凳係池底，坐係度高度剛剛好，有D涼風吹埋黎，好舒服架。

有好多中藥池，當然要盡試啦，最有真實感係當歸池，因為一落水就好有當歸味，雖然浸得一次半次都無咩效，不過精神上都覺得唔錯。

第二日試咗礦砂浴，全身都係熱砂，都有D重，仲feel到腳同手指嘅脈搏跳得好勁，感覺好得意。
最愛嘅係石板浴，當我地浸到好熱又想休息下，就會係呢個熱板上面訓一陣，真係舒服到唔想起身。
夜晚嘅景靚過朝早

水幕電影

第三日朝早沿海邊行，可惜天色唔靚，否則更加寫意。

沿途發現D菇類植物，好得意！

由於天氣唔好，大家都無咩興致影相，合照都係最後一日係咁二影幾張。
總括而言，今次旅行嘅目的係放鬆 + 休息，結果都可以達標，都算OK啦！

呢度除咗溫泉，都無咩嘢玩，留係呢度3日，如果休息唔係唯一目的，最好第二晚去澳門住，起碼有美味嘅食物滿足一下。

澳門逛一逛

好耐無去澳門啦！對上一次都已經幾年前，嗰時都未有威尼斯人酒店。

終於係上年12月即日來回一日遊，由朝去到晚，都幾攰架。

總括嚟講，呢度雖然無新奇刺激嘅遊戲活動，不過今次目的只係行、影、食、hea，近近地去澳門都唔錯。

首先去到澳門議事亭附近，呢度係一個最熟悉嘅地方，因為每次去澳門必定會到。

平時只係喺民政總署經過，今次有機會入去影吓相。呢度以前有幅牆生滿攀藤，好似〝天空之城〞其中一個畫面，可惜今次只係疏疏落落，無咗個份感覺啦。

下一站 - 主教山 ，係呢度都影咗好耐相，最攪笑係趁管理員食飯嘅時候，將佢影埋入鏡，成為一幅我地幾滿意嘅自拍作品。

必去景點 - 大三巴，每次都要嚟，好似唔去過就無到澳門咁。

新景點 - 漁人碼頭，好多人話呢度好悶，無嘢玩無嘢行，大家講得對，不過我又幾鍾意呢度，因為唔多人，建築物都幾靚，係度影吓相，係海邊飲吓嘢都幾舒服架！

最後一站 - 威尼斯人酒店，想去好耐，因為想重拾Las Vegas嘅感覺，搭車經過外面時，真係好大，都勾到小小回憶，不過都係Las Vegas好D......

今次都有好多美味嘅食物，不過同人哋講開，總有D嘢唔記得去食，又發現仲有其他好味嘅可以試，所以下次都可以再去！

一個人去旅行

上次差D要一個人去旅行，所以有人借左呢本書比我睇，比D安慰我。

睇完呢本書，裡面有D感受真係好真實，我都同樣有過。

有一次同Pionne去日本，回程時佢返美國，我就遲幾個鐘先上機返香港，所以一個人係東京渡過。

可能之前幾日都一齊玩，有講有笑，有人陪，當只係淨返一個人既時候，感覺好寂寞呀！經過既路，行過既舖頭，明明前一日都好有興趣，忽然好失落，唔想再留係度。如果一開始就一個人去旅行會好Ｄ，因為無比較，無咁孤單呀！

又試過一個人唔敢入去舖頭食野，好似好驚咁！

其實一個人去旅行都要幾大勇氣，唔可以怕孤單，唔可以怕羞，唔可以怕陌生人，唔可以怕冒險，唔知我會唔會試一次呢？！

南丫島尋寶

繼續我既假期，今日同Sammi去左南丫島，今次係好有目標咁去，因為我地要去尋寶……

前兩個星期有同事去南丫島，佢收埋一D野，等我地今次去搵返出黎。

另外，我地用半個鐘既時間，分開影低島上唔同既花，睇下邊個搵得最多。






哈哈，好似好無聊，不過都幾得意，當我地搵到同事留低既野，好似完成一個task，幾有滿足感喎！搵到啦！


每次去南丫島都無機會睇風車，今次得償所願，近距離見到風車，聽住佢轉動既聲音，望住對出既海，呢個環境都幾舒服。可惜我地趕住去索罟灣尋寶，所以唔可以久留。


完成一日既行程之後，隻腳痛左一日。