海泉灣 - 充電之旅

終於可以連續放3日假，決定離開香港，結果去咗珠海海泉灣。
溫泉係今次嘅主打節目，由於兩日都凍凍地，所以特別舒服。

第一日下晝4點入場，結果係裡面按摩 + 食飯，夜晚11點先離開。

第二日再去，朝早11點去到下晝5點，每次都話留兩三個鐘，結果都係唔捨得走。

呢度有80幾種溫泉，包括室內同室外，我最鍾意係一出去個露天大溫泉，有張凳係池底，坐係度高度剛剛好，有D涼風吹埋黎，好舒服架。

有好多中藥池，當然要盡試啦，最有真實感係當歸池，因為一落水就好有當歸味，雖然浸得一次半次都無咩效，不過精神上都覺得唔錯。

第二日試咗礦砂浴，全身都係熱砂，都有D重，仲feel到腳同手指嘅脈搏跳得好勁，感覺好得意。
最愛嘅係石板浴，當我地浸到好熱又想休息下，就會係呢個熱板上面訓一陣，真係舒服到唔想起身。
夜晚嘅景靚過朝早

水幕電影

第三日朝早沿海邊行，可惜天色唔靚，否則更加寫意。

沿途發現D菇類植物，好得意！

由於天氣唔好，大家都無咩興致影相，合照都係最後一日係咁二影幾張。
總括而言，今次旅行嘅目的係放鬆 + 休息，結果都可以達標，都算OK啦！

呢度除咗溫泉，都無咩嘢玩，留係呢度3日，如果休息唔係唯一目的，最好第二晚去澳門住，起碼有美味嘅食物滿足一下。