唔認老都唔得

今日去姑姐屋企拜年，表哥個女都有嚟，上次同佢傾計已經係幾年前，今日問佢幾時畢業，佢話兩年前已經出嚟做嘢啦。

吓！原來已經廿幾歲啦！係我心目中，佢仲係好細個，時間真係眨下眼就過去。

跟住見到另外一個表哥個女張相，嘩！變咗咁大個嘅！00年同媽咪去加拿大探佢哋時，佢只得5歲左右，好可愛嘅小朋友，依家真係好難接受佢已經變成一個少女！

今日睇住身邊朋友嘅BB仲好細個，其實好快佢哋就會長大成人，呢種過程有D恐怖不過又好奇妙！哈哈！

以前聽人講〝唔認老都唔得〞，依家真係感同身受。