高雄 墾丁 阿里山 - DAY 3

7 Nov 07

晨早7點半就離開民宿，向阿里山出發！

離開墾丁，天氣好左好多，無落雨仲有太陽呢！其實近呢3次去台灣都總係遇上落雨，真係慘！

原來呢日用係交通上既時間特別多，先搭2個鐘巴士去高雄市，再搭2個鐘火車去嘉義，最後用3個鐘搭另一架火車上阿里山，途中當然訓左幾次啦！

去阿里山可以搭巴士或者火車，我地選擇火車因為呢個係阿里山其中一個特色之一，雖然無太大驚喜，不過沿住彎彎曲曲既山路上去，沿路見到偉大又奇妙既大自然景色，仲有雲海，都幾開心。

中途經過〝奮起湖站〞，雖然只停左3分鐘，大家都好把握機會落去月台影相，因為呢個地方都係其中一個景點之一。

由於上個月打風，阿里山鐵路未完全修理好，所以係〝十字路站〞行左一段小路再轉巴士繼續上山，開頭以為要攞住所有行李，行十幾分鐘，原來只係5分鐘就到，不過都有D喘氣……
終於到左海拔2170公尺既阿里山啦！身體OK，無高山症！不過夜晚只係得13度，都幾凍架！ 係山上除左幾間手信店同便利店之外，無咩地方好行，所以食完飯都早D訓，因為第二朝要睇日出，朝早5點要集合！

雖然天上有D雲，不過都幾期待第二日既日出。上次係鳳凰山睇日出失敗左，希望今次可以成功啦！