高雄 墾丁 阿里山 - DAY 2

6 Nov 07

去旅行其實都係想抖下，不過為左唔好浪費時間，都係要一早起身，開始一日既行程………

為左更加認識墾丁呢個地方，我地臨時改變行程，係牛牛屋住多一晚，有多D時間去唔同地方。

呢日天氣就麻麻地啦！因為台灣附近打風，影響最南面既墾丁，又大風又密雨。

平時係香港，一定唔會著雨褸出街，去旅行就咩都做得出，哈哈！不過感覺真係好free，兩隻手都無野攞，比D雨照淋都唔怕個身會濕，可惜無水鞋，所以雙腳就濕晒啦！

晨早8點跟當地半日遊去左以下地方：

南灣、恆春、南門、墾丁國家公園、出火、港口吊橋、風吹沙、鵝鑾鼻、砂島、船帆石

呢度既地底既天然氣沿著岩層既裂隙滲出地面，點火而成出火既景觀。
港口吊橋，呢度勁大風。


鵝鑾鼻燈塔，呢度係台灣最南既地方 睇下後面幾大風！

船帆石

下晝雨開始停啦，我地去左〝國立海洋生物博物館〞

呢度分三個場館，都幾大架！仲可以安排訓一晚，近距離接觸海洋生物呢！

有全亞洲最大既海底隧道，一邊行，D魚就係你頭頂上面經過。

係海洋公園我都好鍾意睇水母館，呢度一樣有，不過唔夠HK咁多燈光同花款。

最開心就係見到一班好可愛既企鵝，佢地游水游得好快，行起上黎左搖右擺，真係好cute。我地仲睇到工作人員餵廿幾隻企鵝食野，好得意架！

行完成個下晝，雙腳非常疲累，傍晚去〝四重溪〞浸溫泉，都算係唔錯既安排。最攪笑就係大家都要戴泳帽先可以入去，呢D又係香港唔會做既！

食完飯同甜品，返到民宿又已經10點半啦！