怪癖

〝讀者文摘〞其中一篇文章提到人既一D怪癖，我發覺自己都中左幾樣喎！你地呢？

(1) 腦海裡面經常響起一首歌，旋律不停係腦間盤旋，有時要幾日先可以將呢首歌放低。
我成日都有呢種情況架。
專家話呢種現象最自然不過，好多人都試過。

(2) 對於某D十幾年前既事記得好清楚，但5分鐘前先發生既事，竟然諗極都諗唔起。
我係經常都會咁樣，有時1分鐘前既事都唔記得，未老先衰？
專家話年紀越大就越容易忘記某D短期記憶，係正常現象。

(3) 有時我地會好執著一定要做某D事，好似忍唔住要將診所既雜誌排返整齊；見到朋友屋企 個相架歪左，要幫佢擺返好。
其實我對於牙刷既擺位都有一定既執著。
專家話係心理學上呢D叫強逼行為症，每個人都有幾種強逼行為症習慣，如果無就好難產生積極向上既心態。但如果我地夾硬強逼人地跟自己去做既話，就會造成傷害，嚴重的話就要尋求心理輔導啦。

(4) 經常自言自語，有時會大聲答心裡面既問題。
有時我都會，不過通常係公司做野時先會，平時多數係心裡面自問自答。
專家話呢種唔算精神分裂，其實自言自語係正常既怪癖，有時係想將要講既說話排練一次，又或者從中搵答案。

(5) 咬手指或者手指甲
呢樣我就無，不過都識得一D人會咁做。
專家話呢種係釋放憂慮既原始方法，不過若令到手指流血既話，就要控制下啦。

(6) 有時我地好冷漠，對事情無動於衷，唔太關心。但係又會為一套戲，一個廣告而喊。
某程度上我都幾冷漠，但係會一邊睇戲一邊喊餐勁喎！
專家話並唔係神經唔正常，只係我地將一D對人既真正情緒，轉移左去虛構既劇情上。為一套戲而喊，係比較安全，為真正發生既事而喊，可能帶有風險。處理人際關係要面對困難痛苦既過程，所以人總係傾向轉移視線。