機不離手

近排見到好多人都係機不離手，唔係打緊PSP就係NDS。當大家等車，等位，等人既時候，都係攞住部機狂打。

今日係酒樓，見到隔離檯坐左11個青年人， 7個都打緊機，其餘4個就睇住佢地打，大家唔使出聲，一切盡在不言中。真係唔明，又唔係約埋一齊打機，出黎酒樓食飯，相信都係諗住傾下計，溝通下啦！真係咁趕要利用埋等上菜同等埋單既時間，各自各繼續投入打機，唔使講野？

我都試過約埋D朋友係人地屋企玩Wii，不過大家對住部電視，打保齡、網球、打拳、跳舞….可以一齊玩一齊笑，感覺又唔同，始終大家有交流係開心D。

好耐之前都試過迷上遊戲機，一玩就唔想停。過唔到版就唔甘心，要再試多次；過到版就同自己講，要乘勝追擊，繼續去…….結果成晚就唔使訓，本來要做既野，最後都無郁過。

有時見到人地玩NDS，D game都好吸引：Photo Hunt、煮野食、做手術…….都有諗過買番部喎！不過知道自己一定不能自控，所以好快打消呢個諗法啦！