馬可團

上星期六，細佬第一次返馬可團契。個日係聖經問答比賽，之前叫佢睇下先，結果因為好忙，所以無睇囉。都驚佢會悶架，佢又眼睏喎，後來問返佢，雖然同主日學形式唔同，不過都覺得OK啦。

好耐之前我係馬可團帶週會，人數都唔多，今次去領詩，多左好多人呀！讀中一既應該無幾多個，望落去，覺得細佬仲係一個小朋友咁，不過以佢主動既性格，識朋友應該無難度既。

當介紹新朋友時，細佬要話比大家知係邊個帶佢黎，我即係望住佢比晒Signal，幾驚佢叫我Bonnie姨姨呀，佢都好醒目，話係Bonnie姐姐帶佢黎………哈哈。

係團契裡面，有D人好似好靜，但單獨同佢地傾計時，又好多野同你講喎。或者係一大班人裡面，要肯定到自己，又傾到計玩得埋，都唔係容易，總要D時間。

不過，佢地對團友既關心，比我印象都幾深刻。個日完左團契後，紅色暴雨，我地係留下食麵，其中一人無帶雨傘，但又唔好意思係舖頭入面只係避雨唔食野，最係決定行出去 (順便等朋友接佢)，隔左一陣，坐係到既人擔心佢會比雨淋，所以特登出去搵佢，後來仲要叫導師出去勸佢返入黎避雨添。