傳福音帶來的喜樂

傳福音唔容易，不過好多時都令心裡面有一種湧出黎嘅喜樂。

今日三福佈道日，同一位新朋友傾信仰，出隊前已知佢係一個非常理性嘅人，亦知決志嘅機會唔高。

一開始已經唔太順利，心裡面就向天父求救，求神比佢有忍耐同明白。雖然中途都有D阻滯，我忽然肚痛要出一出去，不過神嘅恩典真係好夠用。

好享受分享信仰嘅過程，同隊員彼此配搭，大家分享同一個信念，弟兄姊妹之間個種support令我感受到信仰好實在嘅一面。

其實傳福音時唔單止話比對方知我哋信緊咩野，同時亦叫我哋重溫所信嘅個份真實，所以心裡面有一份滿足感。

最後佢仍然要考慮，不過真係好希望佢透過聖經同祈禱，可以搵到佢尋覓咗好耐嘅上帝。

完咗三福佈道日，心裡面嘅喜樂仍然未散，亦都係呢份力量，叫我可以勇往直前。

可以嘅話，希望你下次一齊出隊(無論三福定其他傳福音嘅機會)，一齊享受呢份特別嘅經歷啦！