不速之客

如果有隻蜜蜂飛咗入屋，你會點做呢？

一日傍晚返到屋企，發現一隻蜜蜂係盞燈附近徘徊，心想不妙，用咩方法趕佢走呢？！

第一時間閂埋D房門，跟住打開廳嘅窗，用張噴咗香味嘅紙引佢飛去窗邊，可惜佢成日撞埋塊玻璃，最後都返去盞燈到。

糾纏咗半個鐘，佢都飛唔走，但對我地又有威脅性，最後對唔住啦，我好殘忍咁用卷紙扑死咗佢………

問題解決，不過諗返有D內疚添……

如果有隻大曱甴係你屋企，你又懷疑佢識飛，你會點做呢？

平時見到曱甴，第一時間梗係搵殺蟲水，點知呢日發現用晒……

當時已經係夜晚10點幾 ，超級市場閂咗、去到7-11同Circle K都無得買、我連街坊都唔放過，點知佢話無用殺蟲水好耐啦 (究竟係佢屋企無曱甴，定佢用其他方法對付呢？)

但係我唔可以用拖鞋打佢，一來怕整污糟塊牆，會比媽咪鬧，二來我唔夠勇氣。

最後，要搵家姐返屋企之前，去間通宵營業嘅超級市場買。

唔知點解，我從來無諗過要放生隻曱甴，但係又會因為殺死隻蜜蜂而唔安樂！大家都係昆蟲姐！

可能.....蜜蜂個樣可愛D同乾淨D啦！