三福 - 第二階段 - 完成啦！

轉眼間，4個月嘅三福課程已經完成啦！

總括而言，第二階段嘅訓練係一個好嘅經驗。

仲記得讀第一階段嗰時，雖然可以背熟大綱，向人講福音，不過仍然無信心，只係可以照稿讀，其實唔係好肯定每一部份嘅重點，若超出大綱範圍嘅問題，就唔知點算。(傾開先知有D人都有呢種感覺)

依家對三福內容多咗把握，每次講嘅時候都清楚每部份嘅意思，對於同人分享福音信心都大咗。

曾經有人同我講，三福係一套幾好嘅傳福音方法，若果掌握得好，可以係唔同嘅大綱切入，引用裡面嘅例子，因為幾個月訓練之後，大綱已經背熟，所以唔會咁易遺漏重要內容。依家都感受到呢個方法嘅好處。

每次出隊，都發現好多要改善嘅地方，好似聖經知識、融會貫通講福音嘅智慧、面對唔同人嘅處理技巧等等，感恩都激勵自己更願意去追求靈裡面嘅長進。

未必所有人都鍾意三福呢套方法，其實我都好怕困身，要16個星期都返去上堂、又怕背大綱、怕每星期要搵對象........不過，最後嘅成果可以令自己有進步，可以更加掌握一種傳福音方法，催逼我多去想仲有邊D人未得到神嘅愛……呢D都係值得嘅！

三福強調嘅門徒訓練，其實都好吸引我，好想三福精神令更多人唔單只關心傳福音嘅方法，而係以生命影響生命，叫更多人加入傳福音行列，成為得人漁夫。