維繫

雖然今日已經係舊曆十九，不過仍有D人未食開年飯。

今晚約左舊同學，差唔多埋單既時候，有兩檯客人入黎，佢地應該係親戚，有老有嫩，剛坐低，大人就派利事，跟住大家開始傾計問候。

我一向都唔係太熱切期待過年過節既聚會，無左一份應有既投入。其實唔係幾好，呢種唔緊張既態度，令親戚之間既關係越拉越遠。我估將來媽咪呢一代過去之後，我地呢輩既表親戚會出黎既機會，一定少之又少。

諗起呢種感覺，其實又唔係太好受，能夠生係同一個家族，都唔係必然，可以話係一個福氣，如果無左聯繫，好似有D可惜。

今晚呢兩檯食客，無論幾忙都好，仍然堅持成班親戚一齊食開年飯，不論係唔係老人家既安排，都欣賞佢地願意維繫個份心意。