Monchhichi 新成員

話說03年既某一日，我幫個朋友買左一隻Monchhichi，媽咪一見鍾情，話佢D手腳同條尾好得意，好可愛，後來就買左一隻返屋企啦。

本來我對佢地無咩好感，但唔知係唔係對得多有感情，望望下，佢個樣有真係好可愛喎，成日笑咪咪，無論你心情好唔好，佢都係好天真咁對住你笑，令人見到心情就好番晒。陸續，我地就時不時加入一D新成員，其中一隻手抱既size仲得意，好似抱住個人仔咁。

自從兩年前，媽咪見到六姨個隻喊包Monchhichi之後，就成日都想擁有一隻，話佢喊得好可愛，最緊要係個滴眼淚喎！ 我就最怕佢喊啦，笑唔係好D咩？開開心心呀！可惜，已經無再出呢個系列，搵左好耐都買唔到。中間都買過另一隻系列既喊包Monchhichi BB，不過都係爭D。

上星期日終於比我意外地見到喊包Monchhichi啦，不過無出手抱既size，只得mini版。算啦，雖然係細隻D，不過神情都係一樣，應該滿足到媽咪既。帶佢返到屋企，媽咪都覺得細個左D，不過佢個喊包樣就一樣，最終都得到佢既憐愛啦。