擴堂

最近教會好多人傾開擴堂既事。

原來上次擴堂大概9年前啦，由石蔭街市搬到依家既光輝圍。仲記得當時既我都唔知咩野係擴堂，只知教會要搬咪一齊搬囉。

係〝教會五年計劃〞入面，都有擴堂既打算，而係今年年頭，曾經有個賣盤係光輝圍〝歌德餐廳〞舊址，1萬呎左右，不過要1千7百萬，買唔起呀！但係擴堂既計劃就具體左，唔只淨係諗既階段啦。

到最近，教會收到地產既fax，有個租盤係大窩口創意無限商場(即係東亞商場)，大概10萬租金一個月，都有1 萬呎。雖然每日都有好多fax，但牧師留意到呢張，係呢個timing之下，會唔會係神既提醒，叫我地諗諗如果買唔到，可以考慮租喎！

第一個感覺係，要搬出光輝圍?！當去完實地考察之後，覺得個地方都ok，雖然去MTR唔算好方便，不過係光輝圍都差唔多啦，如果去荃灣就方便左啦，行去都得。

附近有好多唔同大小既教會喎！會唔會搵唔到新朋友架！不過諗落，我地既新朋友，大部分都係以〝關係佈道〞既形式帶返黎，就算有其他教會，都唔會成為我地人數增長既阻礙啦。最重要係有一個方便既地方比大家聚會。

錢！係其中要考慮既因素。上次睇左有關既財政預算，如果搬去大窩口，裝修費大概300萬，每月租金大概10萬，呢D數字都幾大喎！當然頭兩年需要肢體既奉獻同免息貸款，但如果賣出光輝圍之後，就有一筆現金運用，加上人數增長，都可以應付到，而且長遠都能夠平衡。另一方面，如果繼續留係呢度，每隔幾年都可能要三十萬的維修費，人數增長會有限制，長遠睇，係財政運作上未必會比租既好呢！

有人問，點解一定要搬，為咩呢？擴堂唔係因為地方唔夠(雖然我地依家地方都幾緊張)，想我地享受多D活動空間。擴堂係為左擴闊神國既地界，當我地有心志去協助神國既發展，有多D地方，我地就要有傳福音(用諸般既智慧同方法)既行動，帶更多人到神裡面，叫教會增長。

有人問：執事會都傾過呢個地方，依家又開埋諮詢大會，又有個BOARD去介紹，做左咁多野，係咪即係一定要搬呀！

其實真係要睇下大家既意願，先會決定搬唔搬。因為呢個係石蔭堂一家既事，要大家一齊商量過，有共識，有睇見，有同一心志先至決定架。

我相信最重要係神點睇，究竟呢個係唔係神為我地預備既地方呢！真係好需要大家同心係主裡面禱告，等神親自去話比我地知，佢既心意係點樣。如果決定去，大家不但有金錢上既負擔，更重要係擔起叫人認識神，傳福音既責任。

有人提過，神睇重既係我地仲有無擴展神國既熱心，定係安於現狀呢！雖然我地唔一定係大窩口呢個地方擴堂，但我地要向神求一棵愛神愛人既心，係佢預備好既日子，儘我地既力量作出配合。不論地方係邊度，最重要係大家有無睇見呢個異象。

10月22號會開臨時會友大會，請大家切切為呢件事情禱告！